देऊळगाव राजा (जि. बुलडाणा) : अवैध रेती टिप्पर चालकाकडे ३५ हजार रुपये स्वीकारताना एका हेडकॉन्स्टेबलसह होमगार्डला लाचलुचपत प्रतिबंधक विभागाने रंगेहात पकडल्याची घटना आज (ता. २१) सायंकाळी देऊळगाव मही परिसरात घडली. याबाबत अँटी करप्शन ब्युरो यांनी दोघा आरोपींना ताब्यात घेतले.

लाचलुचपत प्रतिबंधक विभागाकडून मिळालेल्या माहितीनुसार नारायणखेड येथील एका टिप्परला बेकायदेशीर रेतीसह पकडण्यात आले होते. सदर टिप्पर विरुद्ध कारवाई करण्याच्या उद्देशासाठी ५० हजार रुपयांची मागणी करण्यात आली होती दरम्यान नारायण खेड येथील २३ वर्षीय टिप्पर चालकाने बुलडाणा अँटी करप्शन ब्युरो विभागाकडे तक्रार नोंदविली होती.

तक्रारीवरून मंगळवारी लाचलुचपत प्रतिबंधक विभागाकडून पडताळणी करण्यात आली. यावेळी ५० हजारापैकी ३५ हजार रुपये स्वीकारताना एका पोलिस कॉन्स्टेबलसह होमगार्ड यांना रंगेहात ताब्यात घेण्यात आले. बुलडाणा अँटी करप्शन ब्युरोच्या सदर कारवाईत देऊळगाव मही येथील हेडकॉन्स्टेबल संजय देविदास चवरे (वय ४०) व होमगार्ड दत्तात्रय उर्फ सोनू भीमराव शिंगणे (रा. देऊळगाव मही) यांना ताब्यात घेण्यात आले. सदर कारवाईत पोलिस निरीक्षक सचिन इंगळे, पोलिस हवालदार महादेव चव्हाण, विलास साखरे,अझहरुद्दीन काझी आदिंनी सहभाग नोंदविला.