अकोला : जिल्हा परिषद सरळ सेवा भरती प्रक्रिया राबविण्यात येत आहे. या भरतीच्या माध्यमातून बेरोजगारांकडून‌ प्रत्येकी ९०० ते‌ हजार रुपये शुल्क वसूल केले जात आहे. ही बेरोजगारांची लूट असून, लोकसभा निवडणुकीच्या दृष्टिकोनातून निधी उभारण्यासाठी ही लूट सुरू असल्याचा आरोप वंचित बहुजन आघाडीचे नेते ॲड. प्रकाश आंबेडकर यांनी केला.

ॲड. आंबेडकर (Prakash Ambedkar) म्हणाले, की महाराष्ट्र सरकार खासगी कंपन्यांमार्फत सुशिक्षित बेरोजगारांकडून सरळ सेवा भरतीसाठी विद्यार्थ्यांची प्रचंड आर्थिक लुट करीत आहे. संपूर्ण महाराष्ट्रात ‘जिल्हा परिषद सरळ सेवा भरती २०२३’ (Akola Zilla Parishad) या नावाने जाहिरात देऊन उमेदवारांकडून महाराष्ट्र सरकार ९०० ते हजार रुपये खासगी कंपनीमार्फत शुल्क वसूल करीत आहे.

राज्य सरकार सरळ सेवा भरतीच्या माध्यमातून सुरक्षित बेरोजगारांकडून कोट्यवधीचा निधी वसूल करीत आहे. युपीएससी, एमपीएससीप्रमाणे नाममात्र शुल्क न आकारल्यास आघाडीतर्फे रस्त्यावर उतरून तीव्र आंदोलन केले जाईल, असा इशारा ॲड. प्रकाश आंबेडकर यांनी दिला.

भीतीचे वातावरण निर्माण करण्याचा प्रयत्न

राज्यात कायदा न मानणारे सरकार आहे. लवकरच लोकसभा निवडणूक होणार आहे. त्या पार्श्वभूमीवर राज्यात भितीचे वातावरण निर्माण करण्याचा प्रयत्न केला जात असल्याचे जळगावातील पत्रकाराच्या मारहाण प्रकरणावर प्रतिक्रिया देताना ॲड. आंबेडकर म्हणाले. हे भितीचे वातावरण कायम ठेवायचे की नाकारायचे, हे मतदारांनी २०२४ च्या निवडणुकीत ठरविले पाहिजे, असे आंबेडकर म्हणाले.