बुलडाणा : आंध्र प्रदेश राज्यातील एनआयए (केंद्रीय तपास संस्था) २०२० मध्ये झालेल्या एका प्रकरणात तपास करत थेट राज्यातील बुलडाणा जिल्ह्यात पोचली आहे. यासोबतच गुजरातमध्येही यासंदर्भात तपास करत गोधरा येथे छापा मारला. दहशतवाद्यांसोबत संबंध असल्याचा संशय व्यक्त करत बुलडाणा जिल्ह्यातून एकाला ताब्यात घेतले आहे. यामुळे जिल्ह्यात खळबळ निर्माण झाली आहे.

एनआयए पथकाकडे जानेवारी २०२० मध्ये झालेल्या एका प्रकरणाचा तपास फेब्रुवारी २०२१ मध्ये आंध्र प्रदेश पोलिसांकडून काढून देण्यात आला होता. त्यानंतर सदर संस्था सातत्याने याप्रकरणी शोधमोहीम राबवीत होती. दरम्यान, हेरगिरीच्या संशयावरून राष्ट्रीय तपास संस्था अर्थात एनआयएने बुलडाणा जिल्ह्यासह गुजरातमधील विविध ठिकाणी छापे मारले.

बुलडाणा जिल्ह्यातील रायपूर पोलिस ठाणे हद्दीतील सोनेवाडी येथून २४ मार्चला सकाळी ७ दरम्यान एका २४ वर्षीय युवकाला ताब्यात घेतले आहे. या अगोदरही याच तपासात एनआयए पथक बुलडाणा जिल्ह्यात येऊन गेल्याची गोपनीय माहिती समोर आली आहे. दहशतवादी हल्ल्याचा कट रचल्याप्रकरणी एनआयएकडून आंध्र प्रदेशमध्ये जानेवारी २०२० मध्ये गुन्हा दाखल केला होता. त्याप्रकरणी बुलडाणा आणि गुजरातमधील गोधरा येथील चार ठिकाणी छापे मारले. संशयास्पद सिमकार्ड, कागदपत्रे व इतर डिजिटल उपकरणे जप्त करण्यात आल्याची माहिती एनआयएने दिली आहे.

भारतात दहशतवादी हल्ले घडवून आणण्यासाठी पाकिस्तानी गुप्तहेरांनी विशाखापट्टणम, मुंबई आणि गोव्यातील आरोपींसोबत कट रचल्याचे आतापर्यंतच्या तपासात उघडकीस आले आहे. याच प्रकरणाच्या तपासात एनआयएचे पथक बुलडाणा जिल्ह्यात आले. बुलडाणा जिल्ह्यात आलेले एनआयएचे पथक हैदराबाद येथील असल्याची माहिती सूत्रांनी दिली आहे.