अकोला : गायरान-शासकीय जमिनीवरील अतिक्रमण हटविण्याची मोहीम जिल्हा प्रशासनाकडून सुरू आहे. ही मोहीम तत्काळ थांबविण्याच्या मागणीसाठी बुधवारी (ता. १७) बिगर सातबारा शेतकरी संघटनेचे नेते भाई जगदिशकुमार इंगळे यांनी आत्मदहनाचा इशारा देत जिल्हाधिकारी कार्यालयावर चढून आंदाेलन केले. पोलिसांनी मध्यस्थी करूत त्यांना खाली उतरविले. अप्पर जिल्हाधिकारी अनील खंडागळे यांच्याशी चर्चा केली. त्यात लवकरच यावर ताेडगा निघण्याची शक्यता वर्तविण्यात आली आहे.

जिल्ह्यात अनेक ठिकाणी गायरान अर्थात ई-क्लास जमीन आहेत. त्यावर ग्रामस्थांकडून पिके घेतली जातात. स्थानिक प्रशासनाकडून हे अतिक्रमरण हटविण्यात येते. त्यातून संबंधित शेतकरी, शेतमुजरांचे प्रचंड नुकसान हाेते. असाच प्रकार काही दिवसांपूर्वी मूर्तिजापूर तालुक्यात घडला. जिल्ह्यातील अतिक्रमणधारक शेतकऱ्यांना ई-क्लास जमिनीवर पेरणी करण्यात आलेली पिके घरात येईपर्यंत सवलत द्यावी आणि शासन निर्णयानुसार ता.१४ एप्रिल १९९० च्या अगोदरील अतिक्रमकांना शेत नियमाकुल करून द्यावे, अशी मागणी हाेत आहे. याच मागणीसाठी बिगर सातबारा शेतकरी संघटना तथा दलित पँथरचे केंद्रीय कार्याध्यक्ष भाई जगदिशकुमार इंगळे यांनी कार्यकर्त्यांनासाेबत ता. १७ ऑगस्ट राेजी दुपारी जिल्हाधिकारी कार्यालयाच्या इमारतीवर चढून आंदोलन करीत प्रशासनाचे लक्ष वेधून घेतले.