अकोला : शिवसेनेच्या (Shiv Sena) वाटेवर असलेले कॉंग्रेसचे (Congress) ग्रामीण उपाध्यक्ष राजेश भारती (Rajesh Bharti) यांची कॉंग्रेसने कार्याध्यक्षपदी नियुक्ती केली आहे. आता ते कॉंग्रेसला सोडचिठ्ठी देतात का? याकडे सर्वांचे लक्ष लागले आहे. त्यांचा शिवसेनेतील अधिकृत प्रवेश लांबणीवर गेल्याने सदर घडामोडी घडल्याचे दिसत आहे.

काँग्रेसच्या प्रदेशाध्यक्षपदाची जबाबदारी नाना पटोले (Nana Patole) यांच्या खांद्यावर आल्यानंतर जिल्ह्यातील नेतृत्वामध्ये बदल करण्यात येत आहेत. त्यानुसार ग्रामीण व महानगरचे जिल्हाध्यक्ष बदलण्यात आले. या बदलानंतर कॉंग्रेसमध्ये अंतर्गत धुसफुस सुरू झाली असून त्याचा फटका आगामी महापालिका व नगर परिषदेच्या निवडणुकीत बसण्याची दाट शक्यता आहे. पक्षातील घडामोडीनंतर महानगर व काही ग्रामीण भागात समर्थक असलेले दाेन पदाधिकारी शिवसेनेच्या वाटेवर असल्याची चर्चा रंगली होती. त्यामुळे कॉंग्रेस नेत्यांनी पक्षातील नाराज पदाधिकाऱ्यांची मनधरणी सुरू केली आहे.

अशा घडल्या होत्या घडामोडी

कॉंग्रेसचे ग्रामीण उपाध्यक्ष राजेश भारती, महानगराचे उपाध्यक्ष नितीन ताकवाले यांनी शिवसेनेचे नेते खासदार अरविंद सावंत यांची १९ ऑक्टाेबर राेजी मुंबईत भेट घेतली हाेती. तेथे सेनेचे जिल्हाध्यक्ष तथा आमदार नितीन देशमुख, राजेश मिश्रा सुद्धा हाेते. तेव्हापासून त्यांच्या शिवसेना प्रवेश लांबला आणि संभाव्य प्रवेशाची दखल घेत कॉंग्रेसने राजेश भारती यांनी माेठी जबाबदारी दिली आहे.