अकोला - अमरावती येथील लाचलुचपत प्रतिबंधक विभागाच्या पथकाने अकोला जिल्ह्यातील बाळापूर तालुक्यात वाडेगाव पोलिस चौकीतील हवालदाराला तीन हजार रुपयांची लाच स्वीकारताना शुक्रवारी अटक केली.

हवालदार सुभाष शालिकराम दंदी (५६) यांनी वाडेगाव येथील २८ वर्षीय तक्रारदाराला प्रतिबंधात्मक कारवाई करण्यात येऊ नये यासाठी चार हजार रुपये लाचेची मागणी केली होती.

तडजोडीत तीन हजार रुपये स्वीकारताना अमरावती एसीबीच्या पथकाने त्याला अटक केली. तक्रारदारावर बाळापूर ठाण्यात भादंवि कलम ५०४, ५०६ अन्वये अदखलपात्र गुन्हा नोंद आहे. त्या अनुषंगाने तक्रारदारावर प्रतिबंधक कारवाई करू नये यासाठी सुभाष दंदी यांनी चार हजारांची मागणी केली. तडजोडीत ठरलेली तीन हजारांची रक्कम पंचांसमक्ष स्वीकारली असता शुक्रवारी आरोपी लोकसेवकाला ताब्यात घेण्यात आले.

आरोपी हवालदाराविरुद्ध बाळापूर पोलिस स्टेशन येथे गुन्हा नोंदविण्यात आला आहे. ही कारवाई एसीबीच्या अमरावती परीक्षेत्राचे पोलिस अधीक्षक मारुती जगताप, अप्पर पोलिस अधीक्षक देविदास घेवारे, पोलिस उपअधीक्षक शिवलाल भगत, मिलिंदकुमार बहाकार यांच्या मार्गदर्शनात अमरावती एसीबीचे पोलिस निरीक्षक चित्रा मेसरे, केतन मांजरे, पोलिस कर्मचारी चित्रा वानखडे, नीलेश महिंगे, संजय कोल्हे, आशिष जांभोळे, बारबुध्दे, स्वप्नील क्षीरसागर यांच्या पथकाने केली.