अकोला : कोरोनाची तिसरी लाट ओसरली असली तरी त्याचा धोका मात्र कायम आहे. त्यामुळेच लसीकरणाला आरोग्य विभाग प्राथमिकता देत आहे. परंतु वर्षपूर्तीनंतर सुद्धा जिल्हा लसीकरणाच्या उद्‍दिष्टपूर्तीपासून अद्याप दूर आहे. असे असतानाच जिल्ह्यात कोव्हिशिल्ड लसीचा साठा मुबलक तर कोव्हॅक्सिनचा साठा अल्प प्रमाणात उपलब्ध आहे. त्यामुळे जिल्ह्यात कोव्हॅक्सिन घेणाऱ्याना केवळ सात दिवसच लस घेता येईल, अशी स्थिती आहे.

देशभरात १६ जानेवारी २०२१ रोजी कोविड-१९ विरोधात लसीकरण मोहीम सुरू करण्यात आली. लसीकरणाच्या पहिल्या टप्प्यात कोरोना योद्धा व वैद्यकीय कर्मचाऱ्यांचे लसीकरण करण्यात आले. त्यानंतर १ मार्चपासून ६० वर्षांवरील ज्येष्ठ नागरिक व दुर्धर आजारग्रस्तांचे लसीकरण करण्यात आले. १ एप्रिलपासून ४५ ते ५९ वयोगटातील नागरिकांसह दुर्धर आजारग्रस्त व १ मे पासून १८ वर्षावरील नागरिकांसाठी लसीकरण मोहीम खुली करण्यात आली.

या वयोगटातील लाभार्थ्यांची संख्या अधिक असल्याने अधिक प्रमाणात नागरिक कोरोनाची लस घेण्यासाठी लसीकरण केंद्रांवर पोहचले. परंतु त्यानंतर सुद्धा जिल्ह्यातील बहुतांश नागरिकांनी कोरोनाची लस न घेतल्याने आरोग्य विभागामार्फत कोरोना प्रतिबंधात्मक लसीकरण अधिक गतीने करण्याचे अभियान हाती घेतले. त्यानुसार १४ ऑक्टोबरपर्यंत जिल्ह्यात कवच कुंडल अभियान राबवण्यात आले. त्यानंतर ‘हर घर दस्तक’ मोहीम राबवण्यात आली. त्यामुळे लसीकरणाची व्याप्ती वाढली. दरम्यान आता १५ वर्षावरील युवकांना सुद्धा कोरोनाची लस देण्यात येत आहे. त्यामुळे लस घेणाऱ्यांची संख्या वाढली आहे, दूसरीकडे कोव्हॅक्सिनचा अल्प साठा मिळत असल्याने लसीकरणावर सुद्धा त्याचा अधून-मधून प्रभाव होत आहे.

अशी आहे लस घेणाऱ्यांची स्थिती

•  एकूण - १९ लाख ५० हजार ९८७

•  पहिला डोस - ११ लाख ८७ हजार ३३२

•  प्रिकॉशन डोस - १३ हजार २१६

अशी आहे शिल्लक लस

•  कोव्हॅक्सिन - ६ हजार

•  कोव्हिशिल्ड - ९५ हजार