खामगाव : गत आठवड्यात ७ व ८ सप्टेंबर रोजी झालेल्या अतिवृष्टीमुळे तालुक्यात १ हजार ३९५ हेक्टर क्षेत्रातील खरीप हंगामातील कापूस, सोयाबीन, उडीद व मका पिकांचे नुकसान झाले आहे. तालुक्यात नुकसानग्रस्त शेतकऱ्यांची संख्या २ हजार १५० आहे. तर आतापर्यंत तालुक्यात ६२२ मि.मी. पावसाची नोंद करण्यात आली असून, झालेल्या नुकसानीची भरपाई मिळण्याची मागणी नुकसानग्रस्त शेतकऱ्यांनी केली आहे.

या वर्षी सुरुवातीला पिकांसाठी पोषक पाऊस पडला परंतु, गत आठवड्यात झालेल्‍या अतिपावसामुळे पिकांचे नुकसान झाले आहे. याचा सर्वाधिक फटका उडीद, मूग या पिकाला बसला आहे. तालुक्यात यावर्षी सोयाबीनचा सर्वात जास्त पेरा झाला आहे. ऑगस्ट महिन्यात पाऊस चांगला बरसल्याने पिके जोमदार झाली होती. परंतु, सप्टेंबर महिन्यात पावसाचा जोर वाढला. त्यातच ७ व ८ सप्टेंबर रोजी तालुक्यात अतिवृष्टी झाल्यामुळे तालुक्यातील भालेगाव, सावरगाव, ढोरपगाव, कुंबेफळ, निपाणा, हिवरा खुर्द, पिंपळगाव राजा या भागातील २ हजार १५० शेतकऱ्यांचे कापूस, सोयाबीन, उडीद व मका पिकांचे नुकसान झाले आहे.

या पावसामुळे १ हजार ३९५ हेक्टर क्षेत्र बाधित झाले आहे. कृषी सहायक, तलाठी व ग्रामसेवक यांच्या संयुक्त पथकाने नुकसानीचे सर्व्हेक्षण केले आहे. खरीप हंगामात पिकांचे नुकसान झाल्याने शेतकऱ्यांच्या हातातोंडाशी आलेला घास हिरावला गेला आहे. अचानक आलेल्या संकटामुळे खरीप उत्पादक शेतकरी संकटात सापडला आहे. त्यामुळे नुकसानीचा तातडीने सर्वे करून शासनाने नुकसान भरपाई द्यावी, अशी मागणी नुकसानग्रस्त शेतकरी करीत आहेत.

खरीप हंगामातील काही पिकांचे पावसामुळे नुकसान झाले आहे. ज्या शेतकऱ्यांनी पीक विमा काढला असेल अशा शेतकऱ्यांनी संबंधित पीक विमा कंपनीकडे तक्रार नोंदवावी. काही अडचणी असल्यास कृषी विभागाशी संपर्क साधावा.

- गणेश गिरी, तालुका कृषी अधिकारी.