अकोला : आधार प्रमाणीकरण करणारे ‘ऑनलाइन पोर्टल’ बंद पडल्याने, महात्मा ज्योतिराव फुले शेतकरी कर्जमुक्ती योजनेत पात्र ठरलेल्या जिल्ह्यातील 25 हजार 605 शतकऱ्यांचे आधार प्रमाणीकरण होऊ शकले नाही. कर्जमुक्तीचा लाभ मिळाला नसल्याने, बँकांनी या शेतकऱ्यांना थकबाकीदार ठरविले असून, खरिपात पीक कर्ज देण्यासाठी सुद्धा अपात्र ठरविले आहे.

दुष्काळ, अतिवृष्टी, अवकाळी पाऊस, किडींचा प्रादुर्भाव व शेतमालाला कमी भाव या नुकसानीच्या जात्यात अडकलेल्या शेतकऱ्याला चिंतामुक्त करण्यासाठी राज्य शासनाने महात्मा ज्योतिराव फुले शेतकरी कर्जमुक्ती योजना जाहीर करून दोन लाख रुपयांपर्यंतचे कर्ज माफ केले. योजनेंतर्गत जिल्ह्यातील एक लाख नऊ हजार 630 शेतकरी पात्र ठरले. त्यांच्या पात्रता याद्यासुद्धा जाहीर झाल्या. परंतु, कर्जमुक्तीच्या प्रत्यक्ष लाभासाठी संबंधित पात्र शेतकऱ्यांच्या बँक खात्याचे आधार प्रमाणीकरण करणे गरजेचे होते. त्यासाठी ऑनलाइन पोर्टल सुरू करण्यात आले होते. परंतु शासनाचे सर्व पोर्टल बंद पडल्याने, जिल्ह्यातील 25 हजार 605 पात्र शेतकऱ्यांचे आधार प्रमाणीकरण होऊ शकले नाही आणि त्यामुळे या सर्व शेतकऱ्यांना कर्जमुक्तीच्या लाभापासूनसुद्धा वंचित राहावे लागले. यापेक्षा चिंतेची बाब म्हणजे, या सर्व शेतकऱ्यांच्या खात्यावर कर्जाची रक्कम थकीत असल्याने, बँकांनीसुद्धा त्यांना थकबाकीदार ठरवून नव्याने पीक कर्ज देण्यास मनाई केली आहे. त्यामुळे केवळ आधार प्रमाणीकरण होऊ शकले नसल्याने, जिल्ह्यातील हे हजारो शेतकरी निराधार झाले असून, खरीप पेरायचा कसा, याची चिंता त्यांना लागली आहे.

आधार प्रमाणीकरण आवश्यक
महात्मा ज्योतिराव फुले शेतकरी कर्जमुक्ती योजनेंतर्गत जिल्ह्यातील एक लाख नऊ हजार 630 शेतकरी पात्र ठरले. त्यांचेपैकी एक लाख 366 शेतकऱ्यांची जाहीर पात्रता यादीत समावेश असून, आधारप्रमाणीकरण झाल्यानंतर त्यांना कर्जमुक्तीचा प्रत्यक्ष लाभ दिला जाणार होता. परंतु, पोर्टल बंद पडल्याने, 25 हजार 605 पात्र शेतकऱ्यांचे आधार प्रमाणीकरण होऊ शकले नाही. त्यामुळे त्यांना कर्जमाफीचा लाभ अजूनपर्यंत मिळाला नसून, बँकांनी त्यांना थकबाकीदार दर्शविले आहे.
- डॉ. प्रवीण लोखंडे, जिल्हा उपनिबंधक, सहकारी संस्था अकोला

कर्जमुक्ती योजनेंतर्गत पात्र शेतकरी 1,09,630
जाहीर पात्रता यादीत समावेश असलेले शेतकरी 1,00,366
आधार प्रमाणीकरण झालेले शेतकरी 74,619
आधार प्रमाणीकरण न झालेले शेतकरी 25,605