अकोला ः कोरोना संकटामुळे ता.२४ मार्च पासून राज्यातील बस व रेल्वे सेवा बंद आहे. त्यामुळे नागरिकांना होणारा त्रास लक्षात घेता तातडीने बस व शहर बस सेवा सुरू करण्याच्या मागणीसाठी वंचित बहुजन आघाडीतर्फे बुधवारी सकाळी राज्यातील सर्व बस स्थानकांपुढे डफली बजाओ आंदोलन करण्यात आले.

अकोला शहरातील दोन्ही बसस्थानकांसह गांधी रोडवरील अकोला महानगरपालिकेचे मुख्य कार्यालय व डॉक्टर बाबासाहेब आंबेडकर खुले नाट्यगृहा समोर वंचित बहुजन आघाडीच्या कार्यकर्त्यांनी डफडी वाजवून प्रशासनाचे लक्ष वेधले.

कोरोना संकटामुळे सर्वच अडचणीत आले आहे. मात्र काळासोबत काही गोष्टी शासनाने सुरू करण्याची परवानगी दिली. व्यापार हळूहळू पूर्वपदावर येत आहे. दुसरीकडे राज्यातील बस सेवा व रेल्वे सेवा बंदच आहे.