अकोला : जिल्हा परिषदेच्या कृषी विभागामार्फत राबविण्यात येत असलेल्या बीटी बियाणे वितरण योजनेला दिरंगाईचे ग्रहण लागले आहे. त्यामुळे शेतकऱ्यांच्या शेतातील कापूस घरात व बाजारात पोहचल्यानंतर सुद्धा अद्याप ४ हजार ९८६ शेतकरी योजनेच्या लाभापासून वंचित आहेत. जिल्हा परिषदेच्या सत्ताधाऱ्यांनी सदर योजनेसाठी ९००६ लाभार्थी निवडीचे लक्षांक ठेवले होते. त्यापैकी प्रत्यक्षात ५ हजार २० लाभार्थ्यांच्याच खात्यात ६३ लाख ९३ हजार ४८२ रुपयांचे अनुदान जमा करण्यात आले आहे.

आर्थिक वर्ष २०२०-२१ मध्ये जिल्हा परिषदेच्या कृषी विभागामार्फत २ कोटी ४ लाख २५ हजार रुपयांच्या योजना राबविण्याची तरतूद करण्यात आली आहे. त्यामध्ये शेतकऱ्यांना ९० टक्के अनुदानावर बीटी बियाणे वाटप करण्याच्या योजनेचा सुद्धा समावेश आहे. पावसाळा तोंडावर असतानाच सदर योजनेला प्रशासकीय व तांत्रिक मंजुरी देण्याची प्रक्रिया रखडली होती.

परंतु जून महिन्याच्या शेवटी शेतकऱ्यांना कपाशी बीजी-२ बीटी बियाणे लागवडीसाठी ९० टक्के अनुदानावर देण्याच्या योजनेस प्रशासकीय मान्यता देण्यात आली. त्यानंतर जिल्हा परिषदेच्या सर्वसाधारण सभेत योजनेसाठी १ कोटी १८ लाख ४३ हजार रुपयांची भरिव तरतूद करण्यात आली. त्यामुळे ९ हजार ६ शेतकऱ्यांना योजनेचा लाभ देण्याचे लक्ष सत्ताधारी वंचित बहुजन आघाडीने ठेवले होते.

शेतकऱ्यांकडून बिल अप्राप्त
योजनेसाठी काही लाभार्थ्यांनी अद्याप कृषी विभागाकडे बिलच सादर केले नाहीत. त्यामुळे अशा दोन हजार ९५० शेतकऱ्यांचे प्रस्ताव त्रृटींमुळे पडून आहेत. त्यात अकोला तालुक्यातील ७२९, अकोट ७५५, बाळापूर ४४०, बार्शीटाकळी ६४१, पातूर ३८०, मूर्तिजापूर ३५८, तेल्हारा तालुक्यातील ८८९ शेतकऱ्यांचा समावेश आहे.

हेही वाचा - चालत्या बसमध्ये महिलेला अचानक सुरू झाल्या प्रसुतीकळा, कंडक्टरच्या लक्षात येताच

अशी आहे स्थिती
- लाभार्थी लक्षांक - ९ हजार ६
- प्राप्त प्रस्ताव - ५ हजार २०
- पं.स. स्तरावर उपलब्ध - १ हजार ३६
- शेतकऱ्यांकडून बिल अप्राप्त प्रस्ताव - २ हजार ९५०
- लेखा विभागाला सादर प्रस्ताव - ५ हजार २०
- लाभ दिलेले शेतकरी - ५ हजार २०
- लाभाची जमा रक्कम - ६३ लाख ९३ हजार
- लाभापासून वंचित - ५ हजार ८५१ठेव

(संपादन - विवेक मेतकर)