अकोला : मागील तीन वर्षांपासून पोलिसांच्या हातावर तुरी देऊन पळून जाणाऱ्या चौहट्टा बाजार येथील ''गुटखा किंग'' नदीम शाह रेहमान शाह याला गुटख्याची तस्करी करताना दहिहांडा पोलिसांनी अखेर गजाआड केले. पोलिस अधीक्षक बच्चन सिंह, अपर पोलिस अधीक्षक श्री डोंगरे साहेब, उपविभागीय पोलिस अधिकारी अनमोल मित्तल यांच्या मार्गदर्शनाखाली दहीहंडा पोलिस स्टेशनचे ठाणेदार पुरुषोत्तम ठाकरे यांनी ही कारवाई केली.

सविस्तर माहितीनुसार, दहीहंडा पोलिस स्टेशनचे कर्मचारी रात्रीच्या सुमारास गस्त घालताना मिळालेल्या माहितीवरून पोलिस कर्मचारी व पंचाचे मदतीने नाकाबंदी करून धाड टाकली असता नदीम शाह रेहमान शाह यांच्या कब्जातून शासनाने प्रतिबंधित केलेला गुटखा/पान, मसाला अवैधरीत्या वाहतूक करताना सापडला. विशेष म्हणजे नदीम शाह रेहमान शाह हा मागील अनेक वर्षापासून चौहट्टा बाजार परिसरात गुटख्याची अवैध विक्री करत होता.

गत तीन वर्षापासून दहीहंडा पोलिसांना चकमा देत पसार होत होता. मात्र आज पहाटे २.३० वाजताच्या सुमारास टाकळी रस्त्याने हा इसम आपल्या चारचाकी महिंद्रा एक्सयुव्ही पांढऱ्या रंगाची गाडी क्र MH ०२ CP ०६०० ने येत असल्याचे निदर्शनास आले. दहीहांडा पोलिस स्टेशनचे ठाणेदार पुरुषोत्तम ठाकरे आणि कर्मचारी आधीच सापळा लावून होते. सदर इसमाने गाडी त्याच्या घरासमोर थांबवताच पोलिसांनी त्याच्या गाडीची झडती घेतली एकूण ७,६४,४३१ रूपयांचा मुद्देमाल हस्तगत केला.

या विरोधात फिर्यादी म्हणुन स्वतः ठाणेदार पुरुषोत्तम ठाकरे यांनी विविध कलमान्वये गुन्हा दाखल करत नदीम शाह रेहमान शहा याला गजाआड केले. दाखल अधिकारी विजयसिंह चव्हाण असून याप्रकरणी पुढील तपास पुरुषोत्तम ठाकरे करीत आहेत. या संपूर्ण कारवाईत ठाणेदार पुरुषोत्तम ठाकरे, प्रवीण पेटे, दिंडोकार, गोपाल अघडते, मनीष वाकोडे, रामेश्वर भगत, अनिलभांडे यांनी सहभाग घेतला होता.