मोताळा : तालुक्यातील आव्हा येथील शिशिर गजानन घोंगटे या युवकाने केंद्रीय लोकसेवा आयोगाच्या (यूपीएससी) लेखी परीक्षेत देशभरातून ९० वा क्रमांक पटकावला आहे. त्याने केंद्रीय सशस्त्र पोलिस दलात असिस्टंट कमांडंट (सहाय्यक समावेशक) पदाला गवसणी घातली आहे. त्यामुळे मोताळा तालुक्याच्या शिरपेचात मानाचा तुरा खोवल्या गेला आहे.

शिशिर घोंगटे हा तालुक्यातील आव्हा येथील रहिवासी आहे. त्याचे वडील प्रा.गजानन घोंगटे हे वनोजा ता. मंगरूळपीर येथील साळुंकाबाई राऊत महाविद्यालयात प्राध्यापक असून, त्याची आई कल्पना घोंगटे या कळुबाई कन्या विद्यालयात सहाय्यक शिक्षिका म्हणून कार्यरत आहेत.

शिशिरने या परीक्षेसाठी प्रशासकीय सेवा पूर्व प्रशिक्षण केंद्र मुंबई येथे सलग सहा महिने कसून तयारी केली होती. त्यानंतर त्याने थेट दिल्ली गाठली. नुकताच यूपीएससीचा निकाल जाहीर झाला असून, शिशिरने संपूर्ण भारतातून ९० वा क्रमांक पटकावला आहे. त्यामुळे त्याची केंद्रीय पोलिस दलात असिस्टंट कमांडंट म्हणून निवड झाली आहे. असिस्टंट कमांडंट हे पद उपविभागीय पोलिस अधिकारी दर्जाचे आहे.

प्रशिक्षण पूर्ण केल्यानंतर शिशिर हा भारत सरकारच्या अखत्यारीत असलेल्या पोलिस दलात रूजू होणार आहे. जिद्द, चिकाटी व कठोर परिश्रमाच्या बळावर शिशिरने यशाच्या आकाशात उत्तुंग गरुडझेप घेतली आहे. त्याने या यशाचे श्रेय आई, वडिल व शिक्षकांना दिले आहे. या यशाबाबद्दल त्याच्यावर सर्वच स्तरातून अभिनंदनाचा वर्षाव होत आहे.

आव्हा या छोट्याशा गावातील तीन युवक पुणे येथे चार्टंट अकाउंटंट असून, तीन विद्यार्थी सीएची परीक्षा देत आहेत. एक युवक शेगाव येथे तालुका वैद्यकीय अधिकारी आहे. एक जण बोराखेडी येथे मेडिकल ऑफिसर म्हणून कार्यरत आहे. तर, एक युवक नुकताच भारतीय सैन्यात भरती झाला आहे. त्यामुळे आव्हा गावासह तालुका व जिल्ह्याचा अभिमान वाटतो.

- शुभम घोंगटे, युवासेना (उबाठा) उपजिल्हा प्रमुख, बुलडाणा