अकोला - महावितरणच्या अकोला झोनमध्ये येणाऱ्या अकोला, बुलडाणा व वाशीम जिल्ह्यात थकीत देयकांच्या कारणावरून आतापर्यंत ३८१७ ग्राहकांचा वीजपुरवठा खंडित करण्यात आला आहे. देयके नियमित न भरणाऱ्यांविरुद्ध महावितरण आणखी आक्रमक भूमिका घेत आहे.

अकोला झोनमधील सर्व विभागांत थकीत देयकांची संख्या मोठी आहे. परिणामी महावितरणकडून देयक वसुलीसाठी मोहीम आखली जात आहे. नियमित देयके न भरणाऱ्यांविरुद्ध कठोर पावले उचलून थेट वीजपुरवठा खंडित केला जात आहे. आतापर्यंत महावितरणने अकोला, बुलडाणा व वाशीम जिल्ह्यातील ३८१७ ग्राहकांना वीजपुरवठा खंडित करून ‘शॉक’ दिला आहे. वीजपुरवठा खंडित केलेल्या सर्कलनिहाय वीज ग्राहकांमध्ये अकोला १२४७, बुलडाणा १८४९ तर वाशीम जिल्ह्यातील ७२१ ग्राहकांचा समावेश आहे.

कायमस्वरूपी वीजपुरवठा होईल खंडित

महावितरणकडून वीजबिल न भरणाऱ्या ग्राहकांचा वीजपुरवठा तात्पुरत्या काळासाठी खंडित करण्यात येतो. त्यानंतर ग्राहकांनी ठरावीक मुदतीत वीजबिल भरण्यास सांगण्यात येते. या मुदतीत देयक भरणा न केल्यास कायमस्वरूपी वीजपुरवठा खंडित करण्याचे संकेत महावितरण प्रशासनाकडून देण्यात आले आहेत.