खामगाव : देशी पिस्तुल व जिवंत काडतुसांची विक्री करण्यासाठी जिल्ह्यात आलेल्या एकाला अप्पर पोलिस अधीक्षक दत्त यांच्या विशेष पथकाने रंगेहात पकडले. ही कारवाई २३ नोव्हेंबर रोजी चिखली-खामगाव रोडवरील किन्ही महादेव फाट्याजवळ हिवरखेड पोलिस ठाण्याच्या हद्दीत करण्यात आली.

अप्पर पोलिस अधिक्षक श्रवण दत्त यांना जिल्ह्यात एक व्‍यक्ती पिस्तुल व जिवंत काडतूस विक्रीसाठी आणत असल्याची माहिती मिळाली. या माहितीवरून एएसपी श्रवण दत्त यांनी २३ नोव्हेंबर रोजी दुपारच्या सुमारास चिखली-खामगाव रोडवरील किन्ही महादेव येथे सापळा रचला. माहितीप्रमाणे लाल रंगाची बजाज डिस्कव्हर आली.

यावेळी पोलिसांनी त्यास पकडून त्याची झाडाझडती घेतली असता त्यांच्या गाडीच्या डिक्कीत ३ देशी बनावटी पिस्तुल , ४ जिवंत काडतूस किंमत एकूण ४७ हजार रुपये आढळून आले. यावेळी पोलिसांनी त्यास विचारणा केली असता त्याने उडवाउडवीचे उत्तर दिले. यावेळी पोलिसांनी साबीर खान बिस्मिल्ला खान यास ताब्यात घेऊन त्यांच्याजवळील मोटारसायकल, ३ देशी पिस्तुल व ४ जिवंत काडतुसे असा एकूण ८७ हजार रुपयांचा मुद्देमाल जप्त करून आरोपीला अटक केली.

याप्रकरणी पो. ना. गजानन आहेर यांच्या तक्रारीवरून हिवरखेड पोलिस ठाण्यात रात्री उशीरा गुन्हा दाखल करण्यात आला. सदर कारवाई जिल्हा पोलिस अधीक्षक अरविंद चावरीया यांच्या मार्गदर्शनाखाली व अप्पर पोलिस अधीक्षक श्रवण दत्त खामगाव यांच्या आदेशाने अप्पर पोलिस अधीक्षक यांच्या विशेष पथकातील सहाय्यक पोलिस निरीक्षक गोकुळ सुर्यवंशी, पोहेकॉ गजानन बोरसे , पोना गजानन आहेर, पोना रघुनाथ जाधव, पोना संदिप टाकसाळ, पोना श्रीकृष्ण नारखेडे, पोका राम धामोडे यांनी केली.