अकोला - शासकीय रुग्णालयातील रुग्णांच्या मृत्यूबाबत उपमुख्यमंत्री देवेंद्र फडणवीस यांनी शासकीय यंत्रणांनाच दोष देवून चालणार नसल्याचे सांगून खासगी रुग्णालयातील अत्यवस्‍थ रुग्ण शासकीय रुग्णालयात पाठविले जात असल्याने मृत्यूची संख्या अधिक दिसत असल्याची सारवासावर केली.

अकोला येथील महाआरोग्य शिबिराच्या उद्‍घाटन प्रसंगी बोलताना त्यांनी नांदेड व छत्रपती संभाजीनगर येथील शासकीय रुग्णालयातील रुग्ण मृत्यू प्रकरणात बोलताना शासकीय रुग्णालयांच्या सामाजिक बांधिलकेतेमुळे कोणताही रुग्ण नाकारल्या जात नसल्याचे सांगितले. खासगी रुग्णालयात मृत्यूश्रयेवरील रुग्णांना शासकीय रुग्णालयात पाठविले जाते. येते एकही रुग्ण नाकारला जात नाही आणि पुढेही नाकारल्या जाणार नाही.

त्यामुळे रुग्णांच्या मृत्यूचे प्रमाण शासकीय रुग्णालयात अधिक दिसते. सरासरी मृतांच्या संख्येचा आभासनिर्माण करून त्याचे राजकारण करणे हे नैतिकतेला धरून नाही, असेही ते म्हणाले. सोबतच त्यांनी आरोग्य सेवेत सुधारणा करण्याची गरज असल्याचेही मान्य केले. सुविधा देण्यासाठी निधीची कमरता पडणार नाही, याबाबत त्यांनी आश्वस्त केले. स्थानिक पातळीवर ३० टक्के औषध खरेदी करण्याचे अधिकार दिले असल्याचे उपमुख्यमंत्री म्हणाले.

राऊत काहीही बोलतात!

शिवसेना नेते हे काहीही बोलतात. त्यामुळे त्यांचे बोलणे मी गांभिर्याने घेत नाही, असे उपमुख्यमंत्री देवेंद्र फडणवीस यांनी पत्रकारांच्या प्रश्नाला उत्तर देताना सांगितले. त्यांचे अडीच वर्ष सरकार होते, तेव्हा काय केले, असा मीसुद्धा प्रतिप्रश्न करू शकतो. मात्र, एखाद्या गंभीर विषयावर तसे करणे तर्कसंगत होणार नाही, असे फडणवीस म्हणाले.