अकोला : महाराष्ट्र कापूस पणन महासंघाच्या अकोला विभागीय कार्यालयाचे सहसर व्यवस्थापकाला लाचखोरीच्या प्रकरणात न्यायालयाने दोषी ठरवून एक वर्षाच्या सश्रम कारावास व वीस हजार रुपये दंड ठोठावला आहे. दुसरे जिल्हा व सत्र न्यायाधीश एच.के. भालेराव यांनी हा निर्वाळा दिला.

भ्रष्टाचार प्रतिबंधक कायदा कलम सात व १३(एक)(ड), १३(दोन) अंतर्गत मगनलाल नामदेव पाटील यांच्यावर लाच खोरीचा आरोप होता. सन २००५ मध्ये ते महाराष्ट्र कापूस पणन महासंघाचे अकोला विभागीय कार्यालयात सहसर व्यवस्थापक असताना लाच स्वीकारताना त्यांच्यावर लाचलुचपत प्रतिबंधंक विभागाने कारवाई केली होती. फिर्यादी राजेन्द्र पुंडलिक राऊत यांनी ता. ६ जानेवारी २००५ रोजी तक्रार दिली होती की, त्यांची मानोरा येथे गुरुओम जिंनिंग फॅक्टरी असून, गावातील अन्य जिंनींग फॅक्टरीच्या तुलनेत त्यांना कमी कापूस पुरवठा करण्यात येतो.

मगनलाल पाटील यांनी कापूस पुरवठा सुरळीत करून देण्यासाठी आधी दहा हजार रुपयांची लाच मागितली होती व पुन्हा पाच हजारांच्या लाचेची मागणी केली. या फिर्यादी नुसार ता. ७ जानेवारी २००५ रोजी सापळा रचून आरोपीस लाच स्वीकारताना रोख रकमेसह रंगेहाथ पकडण्यात आले. त्यांच्याविरुद्ध न्यायालयात दोषारोप पत्र दाखल करण्यात आले होते.

या प्रकरणात चार साक्षीदारांच्या साक्षी झाल्यात. आरोपीतर्फे पाच साक्षीदार तपासण्यात आलेत. न्यायालयाने मगनलाल पाटील यांना दोषी ठरवून कलम सात अंतर्गत एक वर्ष सश्रम कारावास व दहा हजार रुपये दंड, तर कलम १३ अंतर्गत एक वर्ष सश्रम कारावास व दहा हजार रुपये दंड, अशी शिक्षा ठोठवली. सरकारतर्फे ॲड किरण खोत यांनी बाजू मांडली. तब्बल १७ वर्षानंतर या प्रकरणाचा निकाल लागला.