संग्रामपूर(जि बुलढाणा) : जळगाव जामोद मतदार संघाचे आमदार तथा माजी मंत्री डाँ संजय कुटे यांनी होळी सणाच्या निमित्ताने उमापूर येथे जाऊन आदिवासी सोबत होळी साजरी केली. आदिवासी समाज बांधवांच्या वतीने आयोजित भोंगऱ्या उत्सवात आमदारांनी सहकुटुंब सहभागी होऊन आदिवासी सोबत होळी सणाचा आनंद घेतला.

आदिवासी बांधवांनी पारंपारिक वादन व नृत्य सादर करून आमदारांचे व त्यांच्या कुटूंबाचे स्वागत केले. आदिवासी बांधवांसोबत माझे अतिशय जिव्हाळ्याचे ऋणानुबंध आहेत, आदिवासी बांधवानी नेहमीच माझ्यावर प्रेम केले आहे, त्यांच्या सोबत होळीचा उत्सव दरवर्षी साजरा करताना होत असलेला आनंद हा शब्दात व्यक्त न करता येणारा आहे. असे उदगार आमदार कुटे यांनी काढले.

होलिकोत्सव हा आदिवासी जीवनातला सर्वांत महत्त्वाचा सण. होळी साजरी करताना आदिवासी संस्कृतीत पुरुष-महिला असा भेदाभेद नाही. गरीब-श्रीमंतीची आडकाठी तर मुळीच नाही. मुक्त आणि प्रसन्न वातावरणात सातपुड्यातील होळी साजरी करण्यात येते. मानवी संस्कृतीची मूल्ये जपणारी ही होळी म्हणूनच या आदिवासी समूहांच्या जीवनात महत्त्वाची आहे. यावेळी आदिवासी तरुणांनी मोठ्या उत्साहात आमदारांना रंग लावत सेल्फी चा ही आनंद घेतला.