तेल्हारा (जि. अकोला) : शहरातील विश्रामगृह जवळील शिवभोजन केंद्रावर शिळे भोजन देत असल्याबाबत नागरिकांकडून तक्रारी येत असल्यामुळे शिवभोजन केंद्रावर तहसीलदार डॉ. संतोष येवलीकर यांनी नायब तहसीलदारांकडून पंचनामा केला. या शिवभोजन केंद्रावर शिळे भोजन दिल्याचे प्रथमदर्शनी निष्पन्न झाले आहे.

गरीब नागरिकांना अल्प दरात पोटभर जेवण मिळावे. जेणे करून कोणी उपाशी राहणार नाही या हेतूने शासनाने शिवभोजन केंद्र सुरू केले आहेत. शहरात हे केंद्र विश्राम गृहाजवळ प्रमोद भटकर यांना देण्यात आले. ते ज्ञानेश्वरी शिवभोजन केंद्र या नावाने केंद्र चालवितात. या शिवभोजन केंद्रावर शिवाजी फोकमारे हे शिवभोजन घेण्यासाठी गेले असता त्यांना शिळे अन्न देण्यात आले. याबाबत शिवाजी फोकमारे यांच्या लक्षात आल्यानंतर त्यांनी शिवसेना पक्षाच्या स्थानिक पदाधिकाऱ्यांना माहिती दिली व तेल्हारा तहसीलदार यांच्याकडे तक्रार केली.

तक्रारीची गंभीर दखल घेत तहसीलदार यांनी नायब तहसीलदार यांना कर्मचाऱ्यांसह शिवभोजन केंद्राची तपासणी करण्यासाठी पाठविले. फोकमारे यांना दिलेले शिवभोजन शिळे व निकृष्ट दर्जाचे असल्याचे निष्पन्न झाले आहे. यावेळी नाना इंगोले, लाभार्थी शिवाजी फोकमारे, युवासेना जिल्हा प्रवक्ते प्रा. सचिन थाटे, आकाश इंगळे उपस्थित होते.