अकोला : वनविभागाच्या आलेगाव परिक्षेत्रातील रोपवनाला वीजचोरी करून पाणी पुरवठा झाला असून, टँकरद्वारे पाणीपुरवठा केल्याचे दर्शवून शासनाकडून लोखोचा निधी लाटण्यात आल्याची तक्रार शेख मोहम्मद शेख मकबुल यांनी जिल्हाधिकारी, महावितरण, जिल्हा पोलिस अधिक्षकांकडे केली आहे. दोषींवर कारवाईची मागणी सुद्धा त्यांनी निवेदनाद्वारे केली आहे.

अकोला प्रादेशिक वनविभागाच्या परिक्षेत्र-आलेगाव, वर्तुळ-मळसूर, बिट-सावरगाव, शिवार-टेकरखेड येथे शासनाच्या महत्त्वकांक्षी ३३ कोटी वृक्षलागवड (२०१८-१९) या योजनेत रोपवन तयार करण्यात आले. या वृक्षांना पाणी देण्याकरिता शासनाकडून प्रमाणित मंजूर लाखो रुपयांचा निधी ‘टँकरने पाणी दिले’ या बनावटी बिलाद्वारे वसूल करून फस्त केल्याचा आरोप शेख मोहम्मद शेख मकबुल यांनी केला आहे. प्रत्यक्षात या शेकडो हेक्टर परिसरातील मंजूर रोपवनात मौजे टेकरखेड येथील शेतकरी लालचंद लक्ष्मण जाधव या शेतकऱ्याच्या शिवारातील विद्युत खांबावर अवैधरित्या आकोडे टाकून वीज चोरी करत, हजारो फुट पाईपाने रोपवनाला आजही पाणी दिले जात असून, हा भ्रष्टाचार व वीज चोरी उपवनसंरक्षकांच्या परवानगीने, सहा. उपवनसंरक्षकांच्या मार्गदर्शनाखाली व वनपरिक्षेत्राधिकाऱ्यांच्या अधिकारात होत असल्याची तक्रार शेख मोहम्मद शेख मकबुल यांनी जिल्हाधिकारी, महावितरण, पोलिस अधिक्षक यांचेकडे निवेदनाद्वारे केली आहे.

संबंधित अधिकाऱ्यांनी व शासनाने या वीज चोरीची गंभीर दखल घेऊन दोषींवर कारवाई करत गुन्हे दाखल करावे व महावितरणच्या आर्थिक नुकसानीची दंडात्मक वसुली करावी, अशी मागणी सुद्धा शेख मोहम्मद शेख मकबुल यांनी केली आहे.

''अशा तक्रारीची प्रत वनविभागाला मिळालेली नाही. असा कोणताही प्रकार वनविभागात होत नाही. वनविभाग कोठूनही पाणी घेत असेल तर, संबंधित शेतकऱ्यांला विजेच्या बिलासहीत मोबदला दिला जातो. यावर्षी टॅंकरवर पैसे काढलेले नसून, डिसेंबरपर्यंत जंगलामध्ये पाणी उपलब्ध असल्याने ते पाणी या रोपवनाला वापरले आहे.''

- वन अधिकारी, अकोला वनविभाग (प्रादेशिक)