अकोला - भाजप सरकारच्या नाकर्तेपणामुळे देशभरात आज बेरोजगारीने उच्चांक गाठला आहे. यामुळे युवा वर्गात असंतोष आहे. त्याचे परिणाम त्यांच्या मानसिक व शारीरिक स्वास्थ्यावर होत आहेत. शेतकऱ्यांसह युवकांच्या आत्महत्येचे प्रमाण वाढलेले आहे. या निषेधार्थ भारतीय युवक काँग्रेसतर्फे राष्ट्रीय बेरोजगार दिन शुक्रवारी (ता.१७) साजरा करण्यात आला. यावेळी युवकांनी पदवीधर पोशाख परिधान करून प्राप्त केलेल्या प्रतिकात्मक पदव्या चुलीत पेटवल्या व मोदी सरकारच्या आर्थिक व रोजगार संबंधित धोरणांच्या विरोधात घोषणाबाजी केली.

युवक काँग्रेसचे जिल्हा अध्यक्ष ॲड. महेश गणगणे यांच्या नेतृत्वात डॉ. बाबासाहेब आंबेडकर खुले नाट्यगृह येथे युवक काँग्रेसच्या पदाधिकाऱ्यांनी पंतप्रधान नरेंद्र मोदी यांच्या वाढदिवसाचे निमित्त साधून वाढत चालेल्या बेरोजगारीच्या समस्येविरुद्ध अभिनव आंदोलन केले. यावेळी युवक काँग्रेसचे शहर अध्यक्ष अंशुमन देशमुख, नगरसेवक पराग कांबळे, प्रदेश पदाधिकारी सागर कावरे, कपिल ढोके, उपाध्यक्ष आकाश शिरसाठ, शहर काँग्रेसचे महासचिव कपिल रावदेव, क्रीडा सेलचे जिल्हाध्यक्ष संजय देशमुख, शेख अब्दुल्लाह, युवक काँग्रेसचे महासचिव अभिलाष तायडे, विजय जामनिक आदींसह युवक काँग्रेसचे पदाधिकारी व कार्यकर्ते उपस्थित होते.