नवी दिल्ली - आपल्या संकेतस्थळाद्वारे अधिकृत मान्यता नसलेल्या बनावट सौंदर्य प्रसाधनांची विक्री केल्याप्रकरणी ड्रग कंट्रोलर जनरल ऑफ इंडियाने (डीसीजीआय)  ई-कॉमर्स क्षेत्रातील ॲमेझॉन व इतर कंपन्यांना नोटिसा काढल्या आहेत. अशा सौंदर्यप्रसाधनांची विक्री झाल्याचे आढळल्यास संबंधित कंपन्यांवर कठोर कारवाई करण्याचा इशारा ‘डीसीजीआय’ने दिला आहे. डीसीजीआयने यासंदर्भात ५ व ६ ऑक्‍टोबर रोजी देशभरात विविध ठिकाणी छापे टाकले होते.

यात वैध परवान्याशिवाय तयार केलेली स्वदेशी सौंदर्यप्रसाधने, तसेच आवश्‍यक नोंदणीशिवाय विदेशातून आयात केलेला कच्चा माल आढळला असून, अशा मिश्रित व बनावट सौंदर्यप्रसाधनांची ई-कॉमर्स प्लॅटफॉर्मवर विक्री होत असल्याचे समोर आले आहे. यानंतर ‘डीजीसीआय’ने या कंपन्यांना नोटीसा पाठवून १० दिवसांत खुलासा करण्यास सांगितले आहे.