स्मिता : ‘काँग्रेट्‌स’ श्रुतिका ! ‘जॉब’ मिळाला !  

श्रुतिका : ‘थॅंक यू’ !  

स्मिता : आता नेटाने काम करून, ‘करिअर’मध्ये भरपूर प्रगती कर... पण त्याच बरोबर तुझ्या कष्टाने तू जे काही पैसे कमावणार आहेस ते योग्य प्रकारे सांभाळ... बचत आणि गुंतवणूक नित्य नेमाने कर.  

- ताज्या बातम्यांसाठी डाऊनलोड करा ई-सकाळचे ऍप

श्रुतिका : अगं, ‘जॉब’मधलं माझं काम मी करेन, पण पैसे सांभाळणं काही माझं ‘डिपार्टमेंट’ नाही.  

स्मिता : असं का म्हणतेस ?  

श्रुतिका : का म्हणजे... अगं आजपर्यंत मी कधीच बचत किंवा गुंतवणुकीविषयी काहीच केलं नाहीये.

स्मिता : अगं अगदी सगळं तूच केलं पाहिजे असं काही नाही. तू एका चांगल्या ‘फायनांशियल ॲडव्हायझर’ची मदत नक्की घेऊ शकते... पण निदान या विषयातील थोडी-फार माहिती प्रत्येकाला असलीच पाहिजे.  

श्रुतिका : पण घरी बाबा आणि दादा आहे की ह्या गोष्टींची काळजी घ्यायला.  

स्मिता : आहो ‘मॅडम’, कुठल्या जमान्यात आहात आपण ? पैश्‍यांचे व्यवहार फक्त पुरुषांनीच करावेत असे काही नाही... उलट इतिहास बघितला तर कळेल की बायकाच धन सांभाळण्यात हुशार असतात.  

श्रुतिका : हो गं... खरंतर, घर हे बाईच चालवीत असते. उधळपट्टी न करता, योग्य ती काटकसर करून घरातील सर्वांचा विचार करूनच ती सर्व निर्णय घेत असते.  

स्मिता : नात्यांचा आणि पैश्‍याचा समतोल अतिशय व्यवस्थित साधते ती.  

श्रुतिका : शिवाय, अडी-अडचणींसाठी निरनिराळ्या ठिकाणी आणि डब्यांमध्ये, पै अन्‌ पै वाचवून ती भरपूर बचत करत राहते !  

स्मिता : बचत होते ही बाब चांगली आहे, पण ह्या पद्धती जुन्या आहेत... आर्थिक आणि गुंतवणूक विश्वातील प्रगतीमुळे, आता पैश्‍याच्या बचतीचे आणि गुंतवणुकीचे अनेक मार्ग उपलब्ध आहेत.  

श्रुतिका : पण आता आपल्यासाठी बचतीचे आणि गुंतवणुकीचे कुठले पर्याय चांगले आहेत आणि ते कसे निवडायचे ?  

स्मिता : या साठीच प्रत्येक मुलीने / महिलेने आता स्वतःची आर्थिक साक्षरता वाढवली पाहिजे.  

श्रुतिका : म्हणजे नेमकं काय करायचं ?  

स्मिता : सोप्पी सुरुवात म्हणून निदान आपल्या घरातील पैशांबाबत होत असलेल्या चर्चेत भाग घ्यावा व आर्थिक गोष्टी समजून घ्याव्यात.  

श्रुतिका : म्हणजे हा आपला प्रांत नाही, असे म्हणायचे नाही.  

स्मिता : बरोबर. पैश्‍यांच्याबाबतीत आपल्या विचारांचा आवाका वाढवला पाहिजे... बचतीतून गुंतवणुकीकडे मार्गक्रमण हवे... आणि सोनं घेण्याच्या पलीकडे विचार झाला पाहिजे.  

श्रुतिका : ओके. आजपासूनच हा अभ्यास सुरू करते.  

स्मिता : मुलगी / महिला नुसती साक्षर नाही, तर ती आर्थिक साक्षरसुद्धा हवी. आर्थिक साक्षरता म्हणजेच खरा इंडिपेन्डेन्स.

श्रुतिका : गॉट इट ! आर्थिक साक्षरता म्हणजेच, स्वातंत्र्य आणि स्वाभिमान !

(लेखक गुंतवणूक क्षेत्रात कार्यरत आहेत.)