‘व्हॅनगार्ड’ ग्रुपचे संस्थापक जॉन बॉगल यांना ‘इंडेक्स फंडाचे जनक’ असे म्हटले जाते. त्यांनी आपल्या हयातीत गुंतवणूक या विषयावर १० पुस्तके लिहिली व ती सर्व गाजली. त्यापैकी ‘बॉगल ऑन म्युच्युअल फंड्स’ या पुस्तकात त्यांनी १२ मार्गदर्शक तत्त्वे सांगितली आहेत. त्यापैकी काही तत्वे अशी-

१) गुंतवणूक हा विषय दिसतो तितका अवघड नाही. तुम्हाला फक्त काही गोष्टी बरोबर करायच्या असतात आणि मोठ्या चुका टाळायच्या असतात.

२) जेव्हा गुंतवणुकीचे अनेक पर्याय उपलब्ध असतात, तेव्हा त्यातील सर्वांत सोपा पर्याय निवडा.

३) स्टॉक इंडेक्स फंडात अर्धे पैसे व उरलेले अर्धे बाँड इंडेक्स फंडात गुंतवून बाजारातील चढ-उतारांकडे दुर्लक्ष करा.

४) ‘समय बडा बलवान’ हे नेहमी लक्षात ठेवा.

५) आपल्या गुंतवणुकीला वाढण्यासाठी भरपूर वेळ दिला, तरच तुम्हाला चक्रवाढवृद्धीचा चमत्कार बघायला मिळेल.

६) तुम्ही जर अतिसुरक्षित गुंतवणुकीच्या मागे लागलात, तर परतावा कमी मिळणार, त्यामुळे दीर्घकाळात उत्तम परतावा मिळविण्यासाठी थोडाफार धोका पत्करावाच लागतो.

७) एखाद्या शेअरमध्ये किंवा बाँडमध्ये सर्व किंवा मोठी गुंतवणूक करण्यापेक्षा तुमची गुंतवणूक विभागून ठेवल्यास जोखीम कमी होते.

८) कोणतीही गुंतवणूक करताना परतावा, जोखीम आणि गुंतवणुकीचा खर्च यांचा नेहमी विचार करा.

९) ‘मिन रिव्हर्सल’चा नियम नीट समजून घ्या. एखाद्या वर्षी तुम्हाला खूप चांगला परतावा मिळाला तर तो पुढील वर्षी कमी होऊ शकतो व एखाद्या वर्षी कमी परतावा मिळाला तर नंतर तो वाढून सरासरी परतावा वाजवी होतो.

१०) एकदा विचारपूर्वक निवडलेल्या मार्गापासून कधीही विचलित होऊ नका- स्टे द कोर्स!

विसाव्या शतकातील एका प्रख्यात गुंतवणूकगुरुंनी सांगितलेली गुंतवणुकीची मार्गदर्शक तत्वे नीट समजून घ्यायची असतील, तर जॉन बॉगल यांचे हे पुस्तक जरूर वाचावे.