मुंबई : रशिया- युक्रेन युद्धामुळे (Russia-Ukraine war) कच्चा तेलाच्या किमतीत मोठी दरवाढ होत असल्यामुळे आज भारतीय शेअर बाजार (Indian share market) पाऊण टक्के घसरले. सेन्सेक्स ३६६.२२ अंश तर निफ्टी १०७.९० अंश घसरला. आज सकाळी आशियाई शेअर बाजार नफा दाखवीत उघडले होते. तर काल अमेरिकी शेअर बाजारही नफा दाखवत बंद झाले होते. त्यामुळे सकाळी भारतीय शेअर बाजारही नफ्यातच उघडले. सकाळी सेन्सेक्सने ५२७.७२ अंशांनी उसळी मारली. यावेळी सेन्सेक्स (Sensex) ५५,९९६.६२ अंश एवढा वर गेला होता. मात्र दुपारी युरोपीयन शेअर बाजार सुरू झाल्यानंतर प्रतिकूल वातावरणामुळे भारतीय शेअर बाजार घसरले. दिवसाखेर सेन्सेक्स ५५,१०२.६८ अंशांवर तर निफ्टी (Nifty) १६,४९८.०५ अंशांवर स्थिरावला.

युक्रेन वरील आक्रमणामुळे अमेरिका व पाश्चिमात्य देशांनी रशियावर निर्बंध लादले आहेत. त्यामुळे कच्च्या तेलाच्या पुरवठयात अडथळे येत असून त्यामुळे त्यात आणखी दरवाढ होण्याची भीती आहे. आजच ब्रेंट क्रूड चे दर प्रती बॅरल मागे ११६.०३ अमेरिकी डॉलर एवढे गेले. त्यातच परकीय संस्थात्मक गुंतवणूकदारांची भारतीय शेअर बाजारांमधील विक्री सुरूच होती. काल त्यांनी सुमारे सव्वाचार हजार कोटी रुपयांचे शेअर्स विकले.

अल्ट्राटेक सिमेंट सहा टक्क्यांनी घसरून ५,९८१ रुपयांवर तर एशियन पेंट सव्वा पाच टक्के घसरून २,८७१ रुपयांवर स्थिरावला. डॉक्टर रेड्डीज लॅब (३,७१९) मारुती (७,५९८) हिंदुस्थान युनिलिव्हर (२,०९१) हे शेअरही अडीच ते साडेतीन टक्के घसरले. आयसीआयसीआय बँक (६९८) बजाज फिनसर्व्ह (१५,७०१) यांचे भावही सव्वा दोन टक्के घसरले. तर दुसरीकडे पॉवर ग्रिड, विप्रो (५६९) टेकमहिंद्र (१,४२७) एचसीएल टेक (१,१३९) यांचे भाव वाढले. टाटा स्टील ची घोडदौड आजही कायम राहिली व त्याने तेराशेचा टप्पा पार करत १,३०३ चा बंद भाव दिला.