कोलकता : देशातील आघाडीची पेमेंट सुविधा देणाऱ्या "गुगल पे'ने आम्ही भारतीयांच्या पेमेंट सेवेशी निगडित माहिती भारतातच ठेवण्यासाठी व्यवस्था करू, असे म्हटले आहे. भारतीयांच्या पेमेंट सेवेशी संबंधित माहिती भारतातच ठेवण्याच्या नियमाची अंमलबजावणी करण्याच्या प्रक्रियेत आम्ही आहोत. मात्र, ही प्रक्रिया विनाअडथळा आणि अत्यंत काळजीपूर्वक पार पडली पाहिजे, असे मत "गुगल पे'चे संचालक शरथ बुलुसू यांनी व्यक्त केले आहे. 

बुलुसू म्हणाले, ""आम्ही भारत सरकारच्या सर्व नियमांचे पालन करू. त्यासाठीची प्रक्रिया सुरू आहे. आम्ही सेवा द्यायला सुरुवात केल्यानंतर सरकारच्या नियमावली आल्या आहेत. आमच्या 6.7 कोटी ग्राहकांना मिळणाऱ्या सेवेत कोणताही व्यत्यय येणार नाही, याची काळजी घेत आम्ही ही प्रक्रिया पूर्ण करणार आहोत. हे काम तांत्रिकदृष्ट्या सोपे नाही. मात्र, याबाबतीत रिझर्व्ह बॅंकेकडून (आरबीआय) चांगले सहकार्य मिळते आहे.'' 

आरबीआयने पेमेंट कंपन्यांना आर्थिक व्यवहारासंबंधित माहिती भारतातील सर्व्हरवर साठविण्याची सूचना केली आहे. सप्टेंबर 2019 अखेर गेल्या 12 महिन्यांच्या कालावधीत "गुगल पे'च्या माध्यमातून 110 अब्ज डॉलरचे व्यवहार पार पडले आहेत. तसेच, ग्राहकांची संख्या तिपटीने वाढून 6.7 कोटींवर पोचली आहे. देशातील आघाडीच्या सात शहरांमधील जवळपास दोनतृतीयांश व्यवहार "गुगल पे'च्या माध्यमातून पार पडत असल्याची माहिती बुलुसू यांनी दिली. 

याआधी व्हॉट्‌सऍपच्या बाबतीतही पेमेंट सेवेशी संबंधित माहिती भारतातच ठेवण्याचा विषय समोर आला होता. आरबीआयने 6 एप्रिलला काढलेल्या परिपत्रकात सर्व सेवा पुरवठादारांनी पेमेंट सेवेशी संबंधित माहिती केवळ भारतातीलच व्यवस्थेत जतन करता येईल, याची काळजी घ्यावी, असे म्हटले होते.