मुंबई - राज्य सरकारांनी आपल्या निधीचे चे व्यवस्थापन तसेच कर्जे, खर्च आणि सहकारी बँकांचे व्यवस्थापन यांच्यात सुधारणा करावी, असा सल्ला रिझर्व बँकेचे गव्हर्नर शक्तिकांता दास यांनी आज येथे दिला.

देशातील विविध राज्य सरकारांच्या वित्त सचिवांची ३२ वी बैठक आज येथे झाली, त्यावेळी गव्हर्नर बोलत होते. या बैठकीला केंद्रीय अर्थ मंत्रालयाचे अधिकारी, कंट्रोलर जनरल आदी वरिष्ठ अधिकारी हजर होते.

सध्याची एकंदर आर्थिक परिस्थिती पाहता राज्य सरकारने कर्ज घेण्याबाबत तसेच आपल्या निधीचे व्यवस्थापन करण्याबाबत काळजी घ्यावी, असेही त्यांनी सुचवले. राज्य सरकारांनी आपल्या खर्चाला शिस्त लावावी तसेच अचानक येणाऱ्या खर्चांचे योग्य व्यवस्थापन करावे, असेही ते म्हणाले. विविध राज्य सरकारांनी बाजारातून कर्ज घेण्याबाबत देखील या बैठकीत चर्चा झाली. राज्य सरकारांचा खर्च तसेच चलनवाढ नियंत्रणात आणण्यातील राज्य सरकारची भूमिका, राज्य सरकारांची कर्ज विषयक धोरणे आणि अन्य मुद्द्यांबाबत या बैठकीत चर्चा झाली. ही माहिती रिझर्व बँकेच्या पत्रकात देण्यात आली आहे.