पेट्रोल डिझेलच्या दरवाढीचा भडका ऑक्टोबरमध्ये सातत्यानं सुरुच आहे. दोन दिवस दर स्थिर राहिल्यानंतर बुधवारी पुन्हा किंमती वाढवण्यात आल्या होत्या. आंतरराष्ट्रीय स्तरावर ब्रेंट क्रूडमध्ये ०.७३ टक्क्यांनी वाढ झाल्यानं दर प्रति बॅरल ८५.२६ डॉलर इतके झाले होते. तर कच्च्या तेलाच्या किंमतीतसुद्धा वाढ झाली. गेल्या तीन वर्षातील ही कच्च्या तेलाची उच्चांकी किंमत आहे.

आज पुन्हा पेट्रोल डिझेलच्या दरात वाढ झाली असून दिल्लीत पेट्रोलचा दर १०७.५९ रुपये तर डिझेल ९६.३२ रुपये प्रति लिटर दराने विक्री होत आहे. मुंबईत पेट्रोलची किंमत ११३.४६ रुपये तर डिझेलची किंमत १०४.३८ रुपये इतकी आहे. कोलकात्यात पेट्रोल १०८.११ रुपये प्रति लिटर दराने विक्री होत आहे. तर डिझेलचे दर ९९.४३ रुपये प्रति लिटर इतके आहेत. पटनामध्ये १११.२४ रुपये प्रति लिटर पेट्रोल असून डिझेल १०२.३९ रुपये दराने विकले जात आहे.

ऑक्टोबर महिन्यात आतापर्यंत जवळपास २० वेळा पेट्रोल डिझेलचे दर वाढवण्यात आले आहेत. २४ सप्टेंबरपासून पेट्रोल डिझेलच्या दरात मोठी वाढ झाली असून पेट्रोल प्रति लिटर ६.४० रुपये तर डिझेल प्रति लिटर ७.७० रुपयांनी महाग झालं आहे. देशातील अनेक शहरांमध्ये पेट्रोलचे दर १०० ते ११० रुपयांच्या वर पोहोचले आहेत. भोपाळमध्ये सर्वाधिक ११६ रुपये लिटर दराने पेट्रोलची विक्री होत आहे. तर डिझेलसुद्धा १०५ रुपये प्रति लिटर इतके महाग आहे.