मुंबई : गोदरेज इंडस्ट्रीजचे (godrej industry ) अध्यक्ष (president) आदी गोदरेज (adi godrej) हे येत्या एक ऑक्टोबर रोजी आपल्या पदाची (chief post) सूत्रे खाली ठेवणार असून नादीर गोदरेज (nadir godrej) हे त्यांची जागा घेतील.

गोदरेज इंडस्ट्रीतर्फे आज ही माहिती प्रसिद्धीस देण्यात आली आहे. आदी गोदरेज हे गोदरेज इंडस्ट्रीज चे अध्यक्ष आणि संचालक म्हणून पायउतार होतील. मात्र ते गोदरेज इंडस्ट्रीज चे मानद अध्यक्ष तसेच गोदरेज ग्रूपचे अध्यक्ष म्हणून काम पाहतील. सध्या गोदरेज इंडस्ट्रीज चे व्यवस्थापकीय संचालक असलेले नादीर गोदरेज हे आता कंपनीचे अध्यक्ष होतील.

गेली चाळीस वर्षे कंपनीची सेवा करताना कंपनीने उत्तम कामगिरी केली, संचालक मंडळाने तसेच सर्व सहकाऱ्यांनी या काळात दिलेल्या पाठिंब्याबद्दल व मार्गदर्शनाबद्दल मी त्यांचा आभारी आहे. संचालकांनी व सर्व सहकाऱ्यांनी तळमळीने, आवडीने आणि मेहनतीने हे यश मिळवले. त्याचप्रमाणे आमचे ग्राहक, व्यावसायिक भागीदार, गुंतवणुकदार यांचादेखील या यशात वाटा आहे, असे आदी गोदरेज यांनी यासंदर्भात म्हटले आहे.

यापुढेही नादीर गोदरेज यांच्या नेतृत्वाखाली कंपनी अशीच उच्चप्रतीची कामगिरी नोंदवेल व आपले लक्ष्य गाठेल, असेही त्यांनी म्हटले आहे. कंपनीला मार्गदर्शन करून तिला घडवणारे अध्यक्ष आदी गोदरेज यांची दूरदृष्टी, त्यांची नीतीतत्वे व नेतृत्व याबद्दल मी संचालक मंडळातर्फे त्यांचे आभार मानतो, असे नादीर गोदरेज यांनी म्हटले आहे. याच वाटेवरून कंपनीची पुढील वाटचाल होईल व याच पद्धतीने ग्राहकांची व समाजाची सेवा करून गुंतवणुकदारांना दीर्घकाळ परतावा दिला जाईल, असेही ते म्हणाले.