मुंबई : महागाई नियंत्रणात ठेवण्यासाठी व्याजदरवाढ चालूच ठेवणार असल्याचे संकेत अमेरिकी फेडरल रिझर्व्हने दिल्यानंतर आज देशात सोने आणि चांदीच्या भावात मोठी घसरण झाली. नवी दिल्लीत आज सोन्याचा भाव प्रति १० ग्रॅममागे ३६५ रुपयांनी घसरून ५१,३८५ रुपये झाला. चांदीचा भावही किलोमागे १०२७ रुपयांनी घसरून ५५,३०१ रुपये झाला.

शुक्रवारी सोन्याचा भाव प्रति १० ग्रॅमसाठी ५१,७५० रुपये होता; तर आंतरराष्ट्रीय बाजारात आज सोन्याचा भाव १,७२१ डॉलर प्रति औंस, तर चांदीचा भाव १८.६२ डॉलर प्रति औंस होता. अमेरिकी डॉलरची मजबुती आणि कच्च्या तेलाच्या किमतीचा परिणाम आंतरराष्ट्रीय मौल्यवान धातूंच्या किमतीवर दिसून आला. त्यामुळे तसेच रुपयातील घसरणीमुळे भारतातही या मौल्यवान धातूंच्या भावात मोठी घसरण दिसून आली, असे एचडीएफसी सिक्युरिटीजने म्हटले आहे.