सरकार आयडीबीआय बँकेतील हिस्सा विकण्याच्या तयारीत आहे. केंद्र सरकार आयडीबीआय बँक महागड्या दराने विकण्याचा विचार करत आहे. ब्लूमबर्गने दिलेल्या रिपोर्टनुसार केंद्र सरकार सरकारी मालकीच्या आयडीबीआय बँक लिमिटेडसाठी सुमारे ६४० अब्ज रुपये (म्हणजे $ ७.७अब्ज) मूल्यांकन शोधत आहे. जर असे झाले तर सरकारच्या हिश्श्याची ही सर्वात मोठी विक्री ठरू शकते. केंद्र सरकार आणि भारतीय आयुर्विमा महामंडळ (LIC) संयुक्तपणे IDBI बँकेतील ६०.७२ टक्के हिस्सा विकणार आहेत. ब्लूमबर्ग न्यूजच्या अहवालानं शुक्रवारी आयडीबीआय बँकेचे शेअर्स 3% वाढले.

सरकारने मागवल्या निविदा

सरकार आयडीबीआय बँकेच्या गुरुवारपर्यंत सुमारे $५.८ अब्जच्या बाजारभावावर आधारित सुमारे 33% प्रीमियमची मागणी करत आहे. सरकारने या महिन्याच्या सुरुवातीला IDBI बँकेतील ६०.७२ % हिस्सेदारी विकण्यासाठी बोलीदारांना आमंत्रित केले आहे.

देशी-विदेशी बँकांनी दाखवला रस

देशी आणि विदेशी बँकांपासून ते बिगर बँकिंग वित्तीय कंपन्या आणि खाजगी इक्विटी फंडांपर्यंतच्या संभाव्य गुंतवणूकदारांनी या मालमत्तेत रस दाखवला आहे. प्रक्रिया पुढे गेल्यास नोव्हेंबरनंतर बोलीदारांना नियामक मान्यता आणि सुरक्षा मंजुरी मिळू शकते. बहुसंख्य भागभांडवलांची विक्री १ एप्रिलपासून पुढील आर्थिक वर्षात लवकरात लवकर पूर्ण होऊ शकते.