नवी दिल्ली - देशातील कंपन्यांनी परदेशात केलेल्या गुंतवणुकीत जानेवारी महिन्यात जवळपास ४० टक्‍क्‍यांनी वाढ झाली. भारतीय कंपन्यांनी जानेवारीमध्ये परदेशात २.१० अब्ज डॉलरची गुंतवणूक केली आहे. 

ताज्या बातम्यांसाठी डाऊनलोड करा ई-सकाळचे ऍप

रिझर्व्ह बॅंकेने यासंदर्भातील आकडेवारी जाहीर केली आहे. भारतीय कंपन्यांनी त्यांच्या परदेशातील व्यवसायात किंवा सहायक कंपन्यांमध्ये मागील वर्षी याच कालावधीत १.४७ अब्ज डॉलरची गुंतवणूक केली होती. मागील वर्षातील डिसेंबर महिन्याच्या तुलनेत या वर्षी जानेवारीमध्ये भारतीय कंपन्यांनी केलेली गुंतवणूक १.९९ अब्ज डॉलरने अधिक आहे. भारतीय कंपन्यांनी जानेवारीत परदेशात गुंतविलेल्या एकूण गुंतवणूकीपैकी ७९.३८२ कोटी डॉलरची गुंतवणूक इक्विटी भांडवलाच्या स्वरुपात आणि ३६.८५५ कोटी डॉलरची गुंतवणूक डेट स्वरुपात केली आहे. उर्वरित ८९.०७५ कोटी डॉलरची गुंतवणूक गॅरंटीच्या स्वरुपात करण्यात आली आहे. 

परदेशात सर्वाधिक गुंतवणूक करणाऱ्या कंपन्यांमध्ये भारती एअरटेल, सिरम इन्स्टिट्यूट ऑफ इंडिया यांचा समावेश आहे. भारती एअरटेलने २४.७५ कोटी डॉलरची गुंतवणूक मॉरिशसमधील सहायक कंपनीत केली आहे. सिरम इन्स्टिट्यूटने नेदरलॅंड्‌समधील सहायक कंपनीत २२.६०७ कोटी डॉलरची गुंतवणूक केली आहे.