मुंबई : टीव्ही, वॉशिंग मशीन आणि फ्रीजसारख्या घरगुती वापराच्या इलेक्ट्रॉनिक वस्तूंच्या किमती मेच्या अखेरपर्यंत किंवा जूनच्या पहिल्या आठवड्यापासून पाच टक्के महागण्याची चिन्हे आहेत. कारण उत्पादकांचा उत्पादन खर्च वाढला असून आता ते त्याचा बोझा ग्राहकांवर टाकत आहेत. अमेरिकी डॉलरच्या तुलनेत रुपयाच्या घसरणीचे हे परिणाम असून उत्पादकांना वस्तूंसाठीचा कच्चा माल आयात करणे आता अधिक महागले आहे.

इलेक्ट्रॉनिक वस्तूंसाठी लागणारा कच्चा माल व उपकरणे बऱ्याच अंशी परदेशातून आयात करावी लागतात. डॉलरच्या तुलनेत रुपया महागल्याने आता या वस्तू उत्पादकांना आयात करणेही महागले आहे. याशिवाय चीनमध्ये कोरोनाच्या प्रकोपामुळे सागरी मालवाहतुकीवर परिणाम झाला आहे. त्यामुळे उपकरणांची कमतरता भासत आहे. त्यामुळे अनेक इलेक्ट्रिक वस्तूंचा बाजारातील पुरवठाही घटला आहे.

ग्राहक इलेक्ट्रॉनिक्स आणि उपकरण उत्पादक संघाने (सिएमा) माहिती दिली की, अमेरिकी डॉलरच्या तुलनेत रुपयात घसरण झाल्याने उद्योगांसाठी अडचणी वाढल्या आहेत. सिएमाचे अध्यक्ष एरिक ब्रेगेंजा यांनी सांगितले की, कच्च्या मालाच्या किमतीत वाढ कायम आहे, त्यात आता अमेरिकी डॉलरच्या तुलनेत रुपया कमकुवत होत आहे. त्यामुळे उत्पादकांचा नफा कमी होण्याची चिन्हे आहेत. गुरुवारी डॉलरच्या तुलनेत रुपया १५ पैशांनी घसरून ७७.४० रुपये प्रतिडॉलर झाला होता.

खर्च कपातीचा प्रयत्न

पॅनेसॉनिक इंडिया आणि दक्षिण आशियाचे सीईओ मनीष शर्मा म्हणाले की, कंपन्या उत्पादन खर्चात कपातीच्या प्रयत्नात आहेत. कच्चा माल महागल्याने ग्राहकांना इलेक्ट्रॉनिक वस्तू खरेदीसाठी ४ ते ५ टक्के अधिक किंमत मोजावी लागेल. ज्यात फ्रीज, वॉशिंग मशीन, मॅक्रोव्हेवचा समावेश आहे.

चीनमधील लॉकडाऊनचा फटका

हायर अप्लायन्स इंडियाचे अध्यक्ष सतीश एन. एस. म्हणाले की, चीनच्या शांघायमध्ये लॉकडाऊन असल्याने उपकरणांच्या पुरवठ्यात बाधा येत आहे. ज्याचा परिणाम जूनपासून दिसण्यास सुरू होईल. ते म्हणाले, एसी आणि फ्लॅट पॅनेलचे टीव्ही यांच्या किमतीवर याचा सर्वाधिक परिणाम जाणवेल, तर फ्रीजच्या किमतीवर त्या तुलनेत कमी परिणाम दिसतील.