मुंबई: बनावट वेबसाईटवरून विमा खरेदी करणे टाळा, असे आवाहन विमा नियामक आणि विकास प्राधिकरणाने (आयआरडीए) ग्राहकांना केले आहे. बनावट वेबसाईटवरील खरेदी टाळून ऑनलाईन फसवणूक टाळावी, याकरिता विमा नियामकाने नोटीस जारी केली आहे. www.irdaionline.org ही बनावट वेबसाईट असून यावरून कोणत्याही प्रकाराच्या विमा योजनांची विक्री केली जात नाही, असे "आयआरडीए"ने स्पष्ट केले आहे. 

सध्या इंटरनेटवर www.irdaionline.org ही बनावट वेबसाईट निदर्शनात आली असून त्यावरून विमा योजनांची विक्री केली जात आहे. मात्र अशा नावाची वेबसाईट अधिकृत नाही किंवा "आयआरडीए"ची मान्यताप्राप्त नाही. दरम्यान "आयआरडीए"ची अधिकृत वेबसाईट www.irdaonline.org. अशी आहे. दरम्यान बनावट वेबसाईट निर्माण करणाऱ्या कंपनी विरोधात कारवाई करण्यात येईल, असे "आयआरडीए"ने म्हटले आहे.