मुंबई : जे. एम. फायनान्शिअल्स या वित्तसेवा विषयक कंपनीने नुकत्याच संपलेल्या ऑक्टोबर ते डिसेंबर या तिमाहीत 216 कोटी रुपये निव्वळ नफा मिळवला असून तो मागीलवर्षाच्या याच तिमाहीपेक्षा सुमारे वीस टक्के जास्त आहे. याच कालावधीतील त्यांचे उत्पन्नही 964 कोटी रुपयांवर गेले आहे.

कंपनीने नुकतेच या तिमाहीचे तसेच डिसेंबर 2021 मध्ये संपलेल्या नऊ महिन्यांचे लेखापरिक्षण न केलेले आर्थिक निकाल जाहीर केले. कंपनीने आपल्या एक रुपया दर्शनी मूल्याच्या प्रत्येक समभागावर पन्नास पैसे इतका लाभांशही जाहीर केला आहे. गेल्या नऊ महिन्यांमधील त्यांचे प्रति समभाग उत्पन्न 6.23 रु. आहे.

कंपनीला पूर्वीच्या वर्षातील या तिमाहीत 890 कोटी रुपये उत्पन्न मिळाले होते. तर त्या तिमाहीत त्यांना 180 कोटी रुपये निव्वळ नफा झाला होता. 31 डिसेंबर 2020 रोजी संपलेल्या नऊ महिन्यांच्या कालावधीत कंपनीला 2,385 कोटी रुपये उत्पन्न मिळाले, वर्षभराने त्यात 22 टक्के वाढ होऊन ते 2,926 कोटी रुपये झाले. तर डिसेंबर 2021 मध्ये संपलेल्या नऊ महिन्यांमध्ये त्यांना 594 कोटी रुपये निव्वळ नफा झाला. त्याआधीच्या वर्षातील याच नऊ महिन्यांमध्ये त्यांना 413 कोटी रुपये निव्वळ नफा झाला. ही वर्षिक वाढ 43 टक्क्यांहूनही जास्त होती.

कंपनीने दिलेली एकूण कर्जे 11,240 कोटी रुपयांवर गेली असून नेट एनपीए 2.76 टक्के आहे. कंपनीच्या कामगिरीबद्दल बिगर कार्यकारी उपाध्यक्ष विशाल कंपानी यांनी समाधान व्यक्त केले असून या नऊ महिन्यांमधील 594 कोटी रुपये निव्वळ नफा हा आर्थिक वर्ष 2020-21 मधील बारा महिन्यांच्या 590 कोटी रुपये नफ्याहूनही जास्त असल्याची मोठीच कामगिरी आहे, असेही ते म्हणाले. सामान्य कर्जदारांसाठीचा तारण कर्जाचा व्यवसायही वाढत असून प्रत्येक तिमाहीत दीडशे कोटी रुपये कर्ज दिले जाते. ग्राहकांना सुलभतेने व्यवहार करता यावेत यासाठी आम्ही डिजिटल व्यवहारांना प्राधान्य देत असल्याचेही त्यांनी सांगितले.