मुंबई : एलआयसीकडून गुंतवणूकदारांना आकर्षित करण्यासाठी २२ अब्ज डॉलर्सचा लाभांश, बोनस जाहीर करण्याची शक्यता वर्तवण्यात आली आहे. याबाबत रॉयटर्स या वृत्तसंस्थेने वृत्त दिले आहे. एलआयसीचा समभाग भांडवली बाजारात सूचीबद्ध झाल्यापासून मोठ्या प्रमाणात घसरण झाली आहे. मे महिन्यामध्ये शेअर बाजारात आलेल्या समभागात आतापर्यंत तब्बल ३५ टक्के घसरण झाली आहे. त्यामुळे गुंतवणूकदारांचे २.२३ ट्रिलियन रुपये नुकसान झाले आहे. त्यामुळे गुंतवणूकदारांना आकर्षित करण्यासाठी कंपनीकडून विविध उपाययोजना करण्यात येत आहेत.

कंपनीतील उच्च अधिकाऱ्यांनी दिलेल्या माहितीनुसार, समभागात पुन्हा तेजी येण्यासाठी प्रयत्न करण्यात येत आहे. कंपनीच्या तिजोरीत असलेल्या ११.५७ ट्रिलियन रुपयांच्या विम्यांच्या मालकीवर कोणत्याही नॉमिनीने हक्क सांगितलेला नाही. यापैकी १.८ ट्रिलियन रुपये खर्च करण्याचा प्रयत्न आहे. याबाबत एलआयसी आणि अर्थ मंत्रालयाकडून कोणतेही उत्तर मिळालेले नाही. एलआयसी कंपनीच्या एका समभागाची किंमत ९४९ रुपये होती, मात्र आता त्यात मोठ्या प्रमाणात घसरण होत तो ६०० रुपयांच्या खाली आला आहे. त्यामुळे त्यामध्ये कोणताही गुंतवणूकदार पैसे गुंतवण्यास इच्छूक नाही. देशातील गुंतवणूकदारांनी समभागात गुंतवणूक करावी, यासाठी कंपनीकडून प्रयत्न सुरू आहेत.