लंडन - कोरोनामुळे सर्वच क्षेत्रांमध्ये आर्थिक मंदी आल्याने कच्या तेलाच्या मागणीत झालेली घट आणि तेलाचे वाढलेले उत्पादन यामुळे कच्या तेलाच्या किमती कमी होत आहेत. यावर उपाय म्हणून तेल उत्पादन करणाऱ्या सर्व देशांनी मे आणि जून २०२० मध्ये तेल उत्पादन कमी करण्याचा निर्णय घेतला असून याला मेक्सिको वगळता इतर सर्व देशांनी सहमती दर्शवल्याची माहिती ‘ओपेक’ने शुक्रवारी दिली. 

बातम्या ऐकण्यासाठी डाऊनलोड करा ई-सकाळचे ऍप

या दोन महिन्यांत दरदिवशी एक कोटी बॅरेलने उत्पादन कमी करण्यात येणार आहे. पेट्रोलियम उत्पादक देशांच्या संघटनेच्या (ओपेक) शुक्रवारच्या बैठकीमध्ये तेलांच्या घटत्या किंमतीबद्दल चर्चा करण्यात आली. यात त्यांनी कच्या तेलाचे उत्पादन कमी करण्याचा निर्णय घेण्यात आला. जुलैपासून हेच उत्पादन दिवसात केवळ ८० लाख बॅरेलचेच (बीपीडी) करण्याचा निर्णय घेण्यात आला. मात्र, त्यांच्या या निर्णयाला मेक्सिको वगळता इतर सर्व तेल उत्पादक देशांनी मान्यता दिली आहे. मेक्सिकोने आपले तेल उत्पादन प्रतिदिन चार लाख बॅरेलवर आणावे असे इतर देशांचा म्हणणे आहे. त्याला त्यांनी नकार दिला आहे. 

कोरोना विषाणूच्या प्रादुर्भावामुळे आणि तेलाच्या किमतीवरून सौदी - रशियामध्ये सुरू असलेल्या वादामुळे २० वर्षांत प्रथमच तेलाच्या किमतीत खूप मोठी घट झाली अहे. उत्पादनात कपात हाच त्यावरील पर्याय असल्याचे या बैठकीत सर्वांनी मान्य केले असले तरी मेक्सिकोने याला नकार देत उत्पादन प्रतिदिन एक लाख बॅरेल एवढेच कमी करण्याचा प्रस्ताव दिला आहे.