नवी दिल्ली - पंजाब नॅशनल बॅंक (पीएनबी) गैरव्यवहारातील प्रमुख आरोपी मेहुल चोक्‍सी याचा अँटिग्वातील ठावठिकाण्याची माहिती द्यावी, अशी विनंती केंद्रीय अन्वेषण विभागाने (सीबीआय) अँटिग्वातील तपास यंत्रणांकडे पत्राद्वारे केली आहे. 

मेहुल चोक्‍सी हा या महिन्यात अमेरिकेतून अँटिग्वात गेला असून, तेथे तो स्थानिक पारपत्र मिळवून राहत असल्याचे समोर आले आहे. या पार्श्‍वभूमीवर ‘सीबीआय’ने अँटिग्वातील यंत्रणांना पत्र लिहिले आहे. यात म्हटले आहे, की फरारी उद्योगपती मेहुल चोक्‍सी याच्याविरोधात इंटरपोलने नोटीस बजावली आहे. या नोटिशीनुसार त्याच्या हालचाली आणि सध्याचा ठावठिकाणा याची माहिती अँटिग्वातील यंत्रणांनी भारत सरकारला द्यावी. 

‘अँटिग्वा ऑब्झर्व्हर’ या वृत्तपत्राने दिलेल्या वृत्तानुसार, चोक्‍सी याने नोव्हेंबर २०१७ मध्ये अँटिग्वाचे नागरिकत्व घेतले होते. त्याने या वर्षी १५ जानेवारीला नागरिकत्वाची शपथ घेतली. आंतरराष्ट्रीय तपास यंत्रणांकडून मिळालेल्या अहवालानंतर चोक्‍सी याला नागरिकत्व देण्यात आल्याचे अँटिग्वातील यंत्रणांनी सांगितले आहे. 

हिरे व्यापारी मेहुल चोक्‍सी आणि त्याचा भाचा नीरव मोदी यांनी ‘पीएनबी’मध्ये सुमारे २ अब्ज डॉलरचा गैरव्यवहार केला आहे. या गैरव्यवहारात बॅंकेतील अधिकाऱ्यांचा सहभाग असल्याचेही समोर आले आहे.

आधीच आखली पलायनाची योजना  
 मेहुल चोक्‍सी याने अतिशय नियोजनपूर्वक विचार करून अँटिग्वाचे नागरिकत्व आधीच स्वीकारले होते. ‘पीएनबी’ गैरव्यवहार उघडकीस येण्याआधी त्याने यासाठी पावले उचलली होती. त्यानुसार तो जानेवारीच्या पहिल्या आठवड्यात भारतातून पळून गेला आणि १५ जानेवारीला त्याने अँटिग्वाच्या नागरिकत्वाची शपथ घेतली, अशी माहिती सूत्रांनी दिली.