आज शेअर बाजारात मोठी अस्थिरता दिसून आली. सुरुवातीला शेअर बाजारमध्ये घसरण झाल्यानंतर बाजार बंद होताना मात्र तो काहीसा सावरल्याचं चित्र आहे. सेन्सेक्समध्ये आज 257 अंकांची वाढ होऊन तो 59,031 अंकावर स्थिरावला. तर राष्ट्रीय शेअर बाजाराचा निर्देशांक असलेल्या निफ्टीमध्ये 86 अंकांची वाढ होऊन तो 17,577 अंकावर स्थिरावला.

गेले दोन दिवस बाजारात सुरू असलेल्या चढउताराला ब्रेक लागला आहे. आज सकाळी पहिल्या सत्रात शेअर बाजाराची सुरुवात घसरणीसह झाली होती. मात्र, काही वेळानंतर बाजार सावरण्यास सुरुवात झाली. सेन्सेक्स निर्देशांकात 567 अंकांची घसरण होऊन बाजार खुला झाला होता.

शेअर बाजार सुरु झाल्यानंतर झालेल्या पडझडीनंतर काही वेळाने बाजार सावरण्यास सुरुवात झाली. सेन्सेक्स 567 अंकांच्या घसरणीसह 58,205 अंकांवर खुला झाला. तर, निफ्टी निर्देशांक 133.35 अंकांच्या घसरणीसह 17,357.35 अंकांवर खुला झाला होता. त्यानंतर बाजारात खरेदीचा जोर दिसून आला. त्यानंतर पुन्हा घसरण सुरू झाली. सकाळी 10.30 वाजण्याच्या सुमारास सेन्सेक्स निर्देशांक 10 अंकांनी वधारत 58,784.46 अंकांवर व्यवहार करत होता. तर, निफ्टी निर्देशांक 2.75 अंकांनी वधारत 17,493.45 अंकांवर व्यवहार करत होता.

आज शेअर बाजारात ऑटो , बँक, कॅपिटल गुड्स, मेटल, फार्मा, ऑईल अॅन्ड गॅस आणि रिअॅलिटीमध्ये आज खरेदी झाल्याचं दिसून आलं. तर माहिती तंत्रज्ञान क्षेत्रातल्या कंपन्यांवर आज काहीसा दबाव असल्याचं दिसून आलं. बीएसई मिडकॅप आणि स्मॉलकॅपमध्ये 0.5 टक्क्यांची वाढ झाल्याचं दिसून आलं.