जगभरात सध्या ओमिक्रॉनची (Omicron) चिंता सतावत आहे. याचा परिणाम भारतात शेअर बाजारावरही (Share Market) दिसून येत आहे. शेअर बाजारात सोमवारी (Monday) मोठी घसरण झाली. सेन्सेक्सच्या (Sensex) निर्देशांकात सकाळी साडे दहा वाजेपर्यंत तब्बल १३०० पेक्षा जास्त घसरण झाली होती. ही घसरण जवळपास अडीच टक्के इतकी आहे. यामुळे सेन्सेक्स ५५ हजार ६६२ अकांवर आला आहे. तर निफ्टीतही (Nifty) २.२५ टक्के घसरणीसह निर्देशांक १६ हजार ६०३ अंकांवर होता.

शेअर बाजारात या घसरणीमुळे गुंतवणूकदारांचे तब्बल दहा लाख कोटींचे नुकसान झाले. अवघ्या दहा मिनिटात बाजार भांडवल तब्बल १०.४७ लाख कोटींनी कमी झाले. शुक्रवारी बाजार भांडवल हे २६४.०३ लाख कोटी रुपये इतकं होतं ते आता २५३.५६ लाख कोटी रुपयांवर पोहोचलं आहे.

ओमिक्रॉनमुळे युरोपीय देशांमध्ये पुन्हा एकदा निर्बंध लागू केले जात आहेत. यामुळे पुन्हा एकदा जागतिक अर्थव्यवस्थेला दणका बसण्याची शक्यता आहे. यातच आज आठवड्याच्या सुरुवातीलाच शेअर बाजारात मोठी घसरण झाली. आशियाई बाजारही आज घसरलेलाच होता. कच्च्या तेलाच्या बाजारातही घसरण दिसून आली. सेन्सेक्समध्ये बजाज फायनान्समध्ये चार टक्क्यांची घसऱण झाली. तर टाटा स्टील, एसबीआय, एनटीपीसी , एचडीएफसी बँक यांच्यातही मोठी घसरण झाल्याचं दिसतं. मात्र सन फार्माचे शेअर्स वधारलेले दिसत होते.

आशियाई शेअर बाजाराप्रमाणेच वॉल स्ट्रिटसुद्धा घसरणीत सुरु आहे. ओमिक्रॉनचे संकट आणि फेडरल रिझर्व्ह पॉलिसी याचा हा परिणाम असल्याचं म्हटलं जातंय. ऑस्ट्रेलियाच्या शेअर बाजारातही १९ अंकांनी घसरण झाली तर निक्कीमध्ये ६१३ अंकांची तर शांघायमध्ये ३१ अंकांची घसरण झाली.