मुंबई: शेअर बाजारात सकाळच्या सत्रात झालेल्या घसरणीनंतर बाजार आता सावरला आहे. केंद्र सरकार परकी गुंतवणुकीवरील अधिभार मागे घेण्याची शक्यता असल्याचे बोलले जात आहे. परिणामी शेअर बाजारातील नकारात्मक वातावरण किंचित कमी झाल्याचे निदर्शनास येत आहे. सकाळच्या सत्रात शेअर बाजारात मुंबई शेअर बाजाराचा निर्देशांक सेन्सेक्स 350 अंशांनी घसरत 36 हजार 102.35 पातळीवर पोचला होता. तसेच निफ्टीने 10 हजार 637.15 अंशांची इंट्राडे नीचांकी पातळी गाठली होती. आता दोन्ही निर्देशांक सावरले आहे. सेन्सेक्स 12 अंशांच्या किरकोळ घसरणीसह 36 हजार 460 अंशांवर व्यवहार करतो आहे. निफ्टी सावरला असून 10 हजार 758.70 अंशांवर व्यवहार करतो आहे. 

सध्या देशात आर्थिक मंदीचे वारे वाहत आहेत. त्यात देशाचे मुख्य आर्थिक सल्लागार कृष्णमूर्ती सुब्रहमण्यम यांनी उद्योगांना सरकारच्या मदतीवर अवलंबून न राहता स्वतःच्या पायावर उभा राहण्याचा सल्ला दिला. त्यामुळे गुंतवणूकदारांमध्ये मोठी निराशा पसरली होती. तसेच अमेरिकी फेडरल रिझर्व्हचे अध्यक्ष जेरॉम पॉवेल यांच्या होणाऱ्या भाषणाकडे जगभरातील गुंतवणूकदारांचे लक्ष लागले आहे.