नवी दिल्ली: सध्या देशभरात कोरोनामुळे अनेक उद्योगधंदे मोठ्या प्रमाणात बंद झाले आहेत तर काही तोट्यात सुरू आहेत. या पार्श्वभूमीवर गुरुवारी भारती एअरटेलचे सुनील मित्तल (sunil mittal) यांना टेलिकॉम क्षेत्राबद्दल चिंता व्यक्त केली आहे. सध्या भारतातील टेलिकॉम उद्योगांवर प्रचंड दबाव आहे. जर भारताचे डिजीटल स्वप्न पूर्ण करायचे असेल तर सरकारने यावर लवकरात लवकर पावले उचलली पाहिजेत. तसेच दूरसंचार शुल्कात वाढ केली पाहिजे, असं वक्तव्य मित्तल यांनी केले.

भारती एअरटेलचे अध्यक्ष मित्तल यांनी पुढे सांगितले की, जर सध्या टेलिकॉम क्षेत्र अडचणीत आहे, दबावही खूप आहे. मी आशा करतो की सरकार, अधिकारी आणि दूरसंचार मंत्रालय या विषयावर लक्ष देईल आणि हे सुनिश्चित करेल की दूरसंचार क्षेत्रात किमान तीन ऑपरेटर असतील आणि त्यांच्या माध्यमातून भारताचे डिजिटल स्वप्न पूर्ण होईल.

मित्तल हे भारती ग्लोबल आणि इंग्लंड सरकारच्या नेतृत्वात उपग्रह संचार कंपनीने आयोजित केलेल्या एका ऑनलाईन कार्यक्रमात पत्रकारांशी बोलत होते. तसेच भारती एअरटेलने भाग भांडवल आणि बाँडच्या माध्यमातून वेळेवर व पुरेशा प्रमाणात निधी जमा केला आहे. तसेच येणाऱ़्या काही वर्षांत बाजारपेठेत भारती एअरटेल कंपनी ठामपणे उभी असेल असा विश्वासही मित्तल यांनी व्यक्त केला

पुढे बोलताना मित्तल म्हणाले की. 5 G सेवा सुरू करण्यासाठी आणि भारताचे डिजिटल स्वप्न पूर्ण करण्यासाठी दूरसंचार उद्योगाने मजबूत राहण्याची गरज आहे. दर वाढवण्याबाबत कंपनी विचार करेल की नाही असे विचारले असता मित्तल म्हणाले की, आम्ही ते करण्यास मागेपुढे पाहणार नाही पण आम्हाला ही वाढ एकतर्फी करता येणार नाही.