बंगळूर : माहिती तंत्रज्ञान क्षेत्रातील आघाडीची कंपनी विप्रो लिमिटेडचे व्यवस्थापकीय संचालक (एमडी) आणि  मुख्य कार्यकारी अधिकारी (सीईओ) पदावरून अबिदाली नीमुचवाला पायउतार होणार असल्याची माहिती कंपनीने दिली आहे. कौटुंबिक कारणांमुळे नीमुचवाला राजीनामा देत असल्याचे म्हटले आहे. तसेच त्यांच्या उत्तराधिकाऱ्याची नियुक्ती होईपर्यंत ते या पदावर कार्यरत राहतील.

ताज्या बातम्यांसाठी डाऊनलोड करा ई-सकाळचे ऍप

1 फेब्रुवारी 2016 ला नीमुचवाला यांनी विप्रोच्या सीईओ पदाची सूत्रे हाती घेतली होती. त्याअगोदर 2015 मध्ये ते विप्रोत सीओओ पदावर कार्यरत होते. विप्रोमध्ये कार्यरत होण्याअगोदर ते टाटा कन्सल्टन्सी सर्व्हिसेसमध्ये (टीसीएस) वरिष्ठ पदावर नियुक्त होते. नीमुचवाला यांच्या कार्यकाळात कंपनीने मोठी प्रगती साधली असून इतर कंपन्यांच्या अधिग्रहणात आणि कंपनीचा डिजिटल व्यवसाय जगभरात विस्तारण्यासाठी मोलाची कामगिरी बजावली असल्याचे विप्रोचे अध्यक्ष रिषद प्रेमजी यांनी म्हटले आहे. तसेच त्यांच्या भविष्यातील वाटचालीस शुभेच्छा दिल्या.

पन्नास वर्षीय नीमुचवाला हे आयआयटी बॉम्बेचे पदव्युत्तर स्नातक आहेत. त्यांच्याकडे औद्योगिक व्यवस्थापनातील पदव्युत्तर पदवी असून एनआयटी-रायपूर येथून इलेक्ट्रॉनिक्स आणि कम्युनिकेशन पदवीधर आहेत.

Budget 2020:स्वातंत्र्यानंतरचं पहिलं बजेट कोणी सादर केलं?

तिसऱ्या तिमाहीत विप्रोच्या एकत्रित महसुलात 2.73 टक्क्यांनी वाढ होऊन कंपनीचा महसूल 15,470 कोटींवर पोचला आहे. मात्र कंपनीच्या नफ्यात मात्र  गेल्या वर्षीच्या तुलनेत 3.2 टक्क्यांनी घट नोंदविली गेली होती.