मुंबई : येस बँक, डीएचएफएल कर्ज फसवणूकीप्रकरणी बांधकाम व्यवसायिक संजय छाब्रियांना १४ दिवसांची न्यायालयीन कोठडी देण्यात आली आहे. डीएचएफएलकडून ६७८ कोटी बेहिशोबी कर्ज घेतल्याचा त्यांच्यावर आरोप आहे. (yes bank scam builder sanjay chhabria got 14 judicial custudy by court)

केंद्रीय तपास यंत्रणा (CBI) ने प्रसिद्ध बांधकाम व्यावसायिक संजय छाब्रिया यांना अटक केली होती. येस बँक-डीएचएफएल घोटाळ्याप्रकरणी ही अटक करण्यात आली आहे. संजय छाब्रिया हे रेडियस ग्रुपचे प्रवर्तक आहेत. 15 फेब्रुवारी रोजी सीबीआयने संजय छाब्रिया आणि त्यांच्या कंपनीच्या 15 ठिकाणांवर छापे टाकले होते, ज्यामध्ये या प्रकरणाशी संबंधित अनेक महत्त्वाची कागदपत्रे जप्त करण्यात आली होती. संजय छाब्रिया तपासात सहकार्य करत नसल्याचा आरोप सीबीआयने केला आहे. केंद्रीय तपास यंत्रणा मार्च 2020 पासून या प्रकरणाचा तपास करत होती.

येस बँक घोटाळ्याप्रकरणी सीबीआयने या वर्षी फेब्रुवारीमध्ये मुंबई आणि पुण्यासह रेडियस डेव्हलपर्सच्या 15 ठिकाणांवर छापे टाकले होते. सीबीआयने रेडियस ग्रुपचे संजय छाब्रिया यांच्या घराचीही झडती घेतली होती. सूत्रांनी दिलेल्या माहितीनुसार, या छाप्याच्या माध्यमातून सीबीआय अशा लोकांवर कारवाई करत आहे ज्यांनी येस बँकेकडून कर्ज घेऊन कर्जाची परतफेड केली नाही. बँकेकडून दिलेले कर्ज न मिळाल्याने बँकेचा एनपीए वाढला आणि आरबीआयला बँकेच्या कामकाजावर बंधने आणावी लागली.