शेअर बाजारात (Stock Market) गुंतवणूकदारांच्या नजरा कायमच बाजारातील दिग्गज गुंतवणूकदारांवर असतात. राकेश झुनझुनवाला (Rakesh Jhunjhunwala), आरके दमानी, डॉली खन्ना, आशिष कचोलिया यांच्यासह शेअर बाजारात असे अनेक दिग्गज गुंतवणूकदार आहेत, ज्यांच्या पोर्टफोलिओवर गुंतवणूकदारांची नजर असते. जर तुम्हाला अनुभवी गुंतवणूकदाराच्या पोर्टफोलिओच्या कोणत्याही स्टॉकमध्ये पैसे गुंतवायचे असतील, तर टायटनच्या (Titan Share Price) शेअर्समध्ये पैसे गुंतवू शकता, असा सल्ला ब्रोकरेज कंपनी (Brokerage Company) मॅक्वेरीनं दिलाय.

टायटनच का?

ब्रोकरेज कंपनी मॅक्वेरीनं या स्टॉकचे आउटपरफॉर्म रेटिंग कायम ठेवलं आहे आणि 3000 रुपयांचे टारगेट दिलं आहे. गुंतवणूकदारांनी या स्टॉकमध्ये पैसे गुंतवले तर त्यांना 54 टक्क्यांपर्यंत परतावा मिळू शकतो, असं ब्रोकरेजचं म्हणणं आहे. ब्रोकरेजच्या अहवालानुसार, कंपनीचा डिमांड ट्रेंड मजबूत दिसत आहे. याशिवाय वाढत्या महागाईमध्ये हा शेअर स्वतःला मजबूत ठेवू शकतो, असा विश्वास ब्रोकरेजनं व्यक्त केलाय.

राकेश झुनझुनवालांचा आवडता स्टॉक

दिग्गज गुंतवणूकदार राकेश झुनझुनवाला यांच्या पोर्टफोलिओमध्ये टाटा समूहाचा (Tata Group) टायटन हा आवडता स्टॉक आहे. मार्च 2022 तिमाहीच्या आकडेवारीनुसार, राकेश झुनझुनवाला आणि असोसिएट्सची टायटन होल्डिंग 5.1 टक्के (44,850,970 इक्विटी शेअर्स) आहे. ट्रेंडलाइननुसार, राकेश झुनझुनवाला यांच्या पोर्टफोलिओमध्ये सध्या 34 स्टॉक आहेत, ज्यांची किंमत 3 जून 2022 रोजी अंदाजे 33,753.9 कोटी रुपये आहे.

नोंद : क्रिप्टो मार्केट, शेअर मार्केट किंवा म्युच्युअल फंडातील गुंतवणुकीत जोखीम असते. यामध्ये फायद्याप्रमाणे नुकसान होण्याचीही शक्यता असते. त्यामुळे क्रिप्टो, शेअर बाजार किंवा म्युच्युअल फंडातील कोणतीही गुंतवणूक करण्याआधी आपल्या वित्तीय सल्लागारासोबत चर्चा करूनच गुंतवणूक करा.