नाशिक : सर्व हवामानात फळे, भाज्या ताज्या राहतील, अशी व्यवस्था असलेली व्हॅन तयार करून, शेतावरील फळे, भाजीपाला या व्हॅनमधून थेट शहरातील रहिवासी भागात विक्रीसाठी पाठविला जातो. थेट ग्राहकांना विक्री होत असल्याने शेतकऱ्यांना किफायतशीर भाव मिळतो. तसेच ग्राहकांना ताजा शेतमाल नेहमीपेक्षा कमी भावात मिळतो. अशी विक्री शेतकऱ्यांना फायदेशीर असल्याने, अशी व्हॅन खरेदी करण्यासाठी बॅंका कर्ज देतात. वाहन खरेदी करून त्यात भाजी-फळे ठेवण्याची सोय, वजनकाटा, पंखे इत्यादी सुविधांसह आठ ते नऊ लाखांपर्यंत खर्च येतो. यापैकी 75 टक्के रक्‍कम बॅंक कर्ज देते. या कर्जासाठी 11 ते 12 टक्के व्याजदर आहे. तारण म्हणून खरेदी केलेले वाहन व वैयक्तिक हमी घेतली जाते. कर्जाची परतफेड पाच वर्षांत करावी लागते. महाराष्ट्र शासनाकडून या विक्री केंद्रासाठी 15 हजार रुपयांचे अनुदान उपलब्ध आहे. यासाठी शासनाच्या https://hortnet.gov.in या वेबसाइटवर ऑनलाइन अर्ज करावा लागतो. हे अनुदान कमी असल्यामुळेच ही योजना लोकप्रिय झाली नाही. अनुदान रक्कम दोन ते अडीच लाखांपर्यंत वाढविण्याची आवश्‍यकता आहे. 

गावातील होतकरू तरुण शेतकऱ्यांनी हा उपक्रम हाती घेऊन दररोज सायंकाळी नजीकच्या शहरातील भागात ठराविक वेळेला ताजा शेतमाल विक्रीला आणल्यास चांगला दर मिळेल. व्हॅनमधील उपलब्ध जागेनुसार आजूबाजूच्या शेतकऱ्यांचाही शेतमाल आणला तर त्यांनाही फायदा होईल. थेट ग्राहकांशी संपर्कामुळे ग्राहकांची मागणी लक्षात घेऊन चार-पाच प्रकारच्या भाज्या शेतकरी पिकवू शकेल. या उपक्रमाबरोबरच रसायनमुक्त भाजी व फळे उपलब्ध करून दिल्यास ग्राहकांचा आणखी चांगला प्रतिसाद मिळेल. प्रत्येक रहिवासी कॉलनीत ग्राहकांना थेट ताजा शेतमाल उपलब्ध करण्यासाठी प्रत्येक गावात निदान एका शेतकऱ्याला हा उपक्रम राबवावा.