Shiv Sena Crisis : दिवंगत शिवसेना नेते आनंद दिघे (Anand Dighe) आणि मातोश्रीमध्ये 2000/2001 च्या दरम्यान काही कुरबुरी सुरु होत्या का? तर होय.. तशी काही वृत्त ठाण्यात आमच्यापर्यंत पोहचत होती. वर्तमानपत्रांमधूनही काही बातम्या यायच्या.

आम्हा शिवसैनिकांमध्ये त्याबाबत दबक्या आवाजात काही कुजबुज सुरु असायची. पण, मग दिघेंनी शिवसेना सोडली असती का? बाळासाहेबांना (Balasaheb Thackeray) सोडलं असतं का? तर, तसं वाटत नाही. ते बाळासाहेबांना त्यांचं दैवत आणि मीनाताई ठाकरेंना आईच्या जागी मानत होते.

'बाळासाहेबांकडे आपली नाराजी व्यक्त केली असती'

शिवसेना (Shiv Sena) हा त्यांचा श्वास होता. खरोखरच काही मतभेद असले असते आणि ते सहन होण्यापलीकडचे असते तर एकतर त्यांनी सरळ जाऊन बाळासाहेबांकडे आपली नाराजी व्यक्त केली असती आणि त्यातूनही काही समाधानकारक मार्ग निघाला नसता, तर ते कदाचित पदावरून बाजूला झाले असते; पण त्यांनी शिवसेनेशी आणि बाळासाहेबांशी प्रतारणा अजिबात केली नसती.

'पराकोटीचं वैमनस्य निर्माण झालं होतं'

असं मी जे काही त्यांना किमान पंधरा वर्षे ओळखत होतो, त्यातून वाटतं. त्यांच्या अकाली आणि आकस्मिक जाण्यानंतर तब्बल वीस-बावीस वर्षांनी त्यांच्या मृत्यूविषयी संशय निर्माण करणारी वक्तव्य करणं किंवा मातोश्री आणि त्यांच्यात जणू काही पराकोटीचं वैमनस्य निर्माण झालं होतं असं चित्र निर्माण करणं हे घाणेरडं राजकारण आहे.

'घाणेरड्या राजकारणाचा मानसिक त्रास होतो'

तुम्हाला काही पक्कं माहिती होतं किंवा संशय होता तर तब्बल वीस वर्षे तुम्ही गप्प का बसलात? असो.. स्व. आनंद दिघे यांच्यासोबत राहिलेल्या - काम केलेल्या माझ्यासारख्या अनेक लोकांना या सगळ्या वादांचा आणि घाणेरड्या राजकारणाचा मानसिक त्रास होतो, म्हणून हे लिहावंसं वाटलं.

2001 साली आजच्याच दिवशी म्हणजे, 26 ऑगस्टला त्यांचं निधन झालं.

(त्यांच्यासोबतचा माझा हा फोटो - 2000 सालातील)

धर्मवीर आनंद दिघेंसोबतचा हा प्रसंग फेसबुक पोस्टव्दारे ज्येष्ठ पत्रकार रवींद्र पोखरकर (Ravindra Pokharkar) यांनी शेअर केला आहे.