पुणे : शहरात ठिकठिकाणी ठेवण्यात आलेले कचऱ्याचे कंटेनर काढून टाकल्यामुळे कचरा कोठे टाकायचा हा प्रश्न सर्वसामान्य नागरिकांना पडला आहे. पूना हॉस्पिटलसमोर कचरा मोठ्या प्रमाणात साचलेला असतो. या कचऱ्यामुळे हॉस्पिटलमधील रुग्ण, स्थानिक रहिवाशी तसेच दिवसभर येणारे-जाणारे वाहनचालक, पादचारी यांना नाकाला रुमाल धरूनच जावे लागते. त्यामुळे आरोग्य कर्मचारी मस्त, आणि नागरिक त्रस्त असा प्रकार वाढला आहे. या दुर्गंधीमुळे रुग्ण व्यवस्थित बरा होईल का? की रुग्ण नसलेला सर्वसामान्य व्यक्ती ही आजारी पडेल! याचा विचार महापालिका प्रशासन, लोकप्रतिनिधींनी केला पाहिजे. त्यामुळे या ठिकाणी महापालिकेने ताबडतोब कचऱ्याचे कंटेनर ठेवून दररोज स्वच्छता केली जाते की नाही याकडे लक्ष दिले पाहिजे.