Mumbai Crime : पतीने उसणे पैसे घेतले होते. ते पैसे मागण्यासाठी एक व्यक्ती घरी आला. मात्र पती घरी नसल्याचे घरातील महिलेने सांगताच संतापलेल्या व्यक्तीने पत्नीच्या डोक्यात हातोडा घातला.

ऐवढेच नाही तर इंजेक्शन सारखी टोकदार वस्तू तिच्या मानेला टोचून तिला गंभीर जखमी केल्याची घटना डोंबिवलीत घडली आहे. याप्रकरणी टिळकनगर पोलीस ठाण्यात ममताराणी पात्रा (वय 36) हिने राजीव भुयान याच्या विरोधात तक्रार दाखल केली आहे.

डोंबिवली पूर्वेतील गोग्रासवाडी परिसरात ममताराणी या परिवारासह राहतात. मंगळवारी सकाळी 11.30 च्या सुमारास राजीव हा ममताराणी यांच्या घरी आला. त्याने ममताराणी यांच्याकडे पतीने घेतलेले उसणे पैसे मला परत करा अशी मागणी केली.

महिलेने पती घरी नाहीत, ते आले की पैसे देऊ असे राजीव याला सांगितले. याचा राग आल्याने राजीव याने संतापाच्या भरात ममताराणी यांना हाताच्या चापटीने मारहाण केली. त्यानंतर राजीवने त्याच्या पिशवीतील हातोडा काढून तो ममताराणी यांच्या डोक्यात मारला. या मारहाणीत त्या गंभीर जखमी झाल्या.

एवढेच नाही तर नंतर राजीवने इंजेक्शनसारखी टोकदार वस्तू काढून ममताराणी यांच्या मानेला टोचली व नंतर तेथून पळ काढला. गंभीर जखमी ममताराणी यांच्यावर रुग्णालयात उपचार करण्यात आले आहेत. त्यांच्या तक्रारीवरुन टिळकनगर पोलिस ठाण्यात राजीव याच्या विरोधात गुन्हा दाखल करण्यात आला असून पोलिस राजीवचा शोध घेत आहेत.