Sawai Gandharva Bhimsen Mahotsav : संगीतप्रेमींचे आराध्य दैवत असणाऱ्या भारतरत्न पंडित भीमसेन जोशी यांनी आपल्या गुरूंना वंदन करण्यासाठी सुरू केलेला सवाई गंधर्व भीमसेन महोत्सव कोरोनामुळे गेली दोन वर्ष रद्द झाला होता.

मात्र यंदा परिस्थिती बऱ्यापैकी नियंत्रणात आल्याने ६८ वा सवाई गंधर्व भीमसेन महोत्सव आयोजित करण्यात आला आहे. आर्य संगीत प्रसारक मंडळातर्फे आयोजित करण्यात येणारा हा महोत्सव दिनांक १४ ते १८ डिसेंबर दरम्यान होणार आहे.

महोत्सव मुकुंदनगर येथील कटारिया शाळेच्या प्रांगणात संपन्न होणार असल्याची माहिती मंडळाचे कार्याध्यक्ष श्रीनिवास जोशी यांनी कळवली आहे. यंदाचा महोत्सवात भारतरत्न पंडित भीमसेन जोशी यांची जन्मशताब्दी साजरी करण्यात येईल. याआधीचा महोत्सव डिसेंबर २०१९ मध्ये आयोजित करण्यात आला होता.

पं. भीमसेन जोशी यांनी १९५३ पासून त्यांचे गुरु सवाई गंधर्व यांच्या स्मरणार्थ ‘सवाई गंधर्व’ महोत्सवाचे आयोजन करण्यास सुरवात केली. पंडितजींच्या निधनानंतर या महोत्सवाचे नामकरण ‘सवाई गंधर्व भीमसेन महोत्सव’ असे करण्यात आले. सांस्कृतिक विश्वातील हा एक अग्रणी महोत्सव मानला जातो. आजवर अनेक दिग्गज कलाकारांनी या महोत्सवात सादरीकरण केले आहे.